منين بالعجوة المقادير: * كيلو دقيق * قطعة خميرة بيرة * 1⁄2 كوب زيت ذرة * كوب لبن دافي * كوب زبدة * رشة ملح * ينسون * شمر الحشو: * 1⁄2 كيلو عجوة مفرومة * ملعقة كبيرة سمنة الطريقة: 1- دوّبي الخميرة في اللبن الدافي مع ربع ملعقة سكر، وسيبيها لغاية ما يتضاعف حجمها، وفي الوقت ده سخّني الزبدة مع الزيت على النار. 2- اخلطي الدقيق مع الملح والشمر أو الينسون، واعملي فيه فتحة في النصف، وحطّي فيها خليط الزبدة والزيت، وقلّبي الخليط مع بعضه بملعقة خشب، لغاية ما العجينة تبقى دافية شوية وتقدري تمسكيها بإيدك، وبعد كده بسّيها بإيدك؛ بمعنى إنك تفركي العجينة بإيدك كويس علشان الدقيق يتشرّب تماما من المادة الدهنية. 3- بعد كده ضيفي عليها خليط اللبن والخميرة، وبعد كده اعجنيها تاني بإيدك لغاية ما العجينة تتلم معاكي وتبقى طرية وتقدري تشكّليها، ولو حسّيتي إن العجينة ناشفة شوية ممكن تضيفي عليها شوية ميه أو لبن دافي. 4- غطّي العجينة بقطعة قماش نظيفة، وسيبيها تهدى شوية لمدة ربع أو نصف ساعة، وفي الوقت ده حضّري العجوة؛ بإنك تقدحي السمنة على النار، وبعد كده تحطّي عليها العجوة، وتقلّبيهم مع بعض لغاية ما تبقى العجوة طرية معاكي، وبعد كده سيبيها تبرد شوية، وقسميها على شكل صوابع طويلة. 5- بعد كده ابدأي في تشكيل المنين وتقطّعيه.. والمنين ممكن تشكّليه بأكتر من طريقة، يعني ممكن تاخدي قطعة عجينة كبيرة وتفرديها بالنشابة، وتحطّي على طرف العجينة صباع عجوة يكون بطول العجينة، وتلفي العجينة بعد كده زي السويسرول، بحيث ما تزيدش عدد اللفات عن مرتين، وبعد كده تقطّعيها قطع صغيرة بالسكينة، وممكن تفردي قطعة تانية يكون عرضها صغير، وتحطي في المنتصف صباع عجوة بطول العجينة، وبعد كده اتني العجينة على العجوة واقفليها من عند الأطراف كويس، وقطّعيها بالسكينة على شكل مستطيلات صغيرة. 6- رصّي قطع المنين في صواني مدهونة بمسحة خفيفة جدا من الزيت، ودخّليهم في فرن ساخن على درجة حرارة متوسطة، وسيبي العجينة في الفرن لمدة 20 دقيقة أو لغاية ما تتأكّدي إنها استوت، وبعد كده طلّعي المنين من الفرن وسيبيه يبرد، وقدّميه مع الشاي أو العصير.. وبالهنا والشفا.
وبكده تكون خلصت وصفتنا النهارده.. استنونا بكره مع وصفة جديدة من وصفات العيد.. وكل سنة وكلكم طيبين..