كل سنة وكلكم طيبين بمناسبة الاحتفال بشم النسيم، والنهارده جبنا لكم طريقة عمل خبز البريوش بناء على طلب كتير من أصدقائنا، ويا رب تعجبكم... البريوش المقادير: * 3 و 1⁄2 كوب دقيق * 3 ملعقة كبيرة سكر * ملعقة كبيرة خميرة فورية * 1⁄2 كوب زيت زيتون * 1⁄4 كيلو لبن دافي * ملعقة صغيرة ملح * 2 بيضة الطريقة: 1- في طبق كبير، اخلطي المقادير الجافة مع بعض؛ وهي: الدقيق والخميرة والملح والسكر. 2- اخفقي البيض مع اللبن بالمضرب الكهربي لغاية ما يختلطوا كويس مع بعض، بس خلّي بالك إن اللبن مايبقاش سخن أوي علشان البيض ما يجمدش. 3- ضيفي خليط اللبن والبيض تدريجيا على خليط الدقيق، واعجنيهم مع بعض بإيدك كويس، وبعدين ضيفي زيت الزيتون. 4- اعجني الخليط كله مع بعضه كويس بإيدك، لغاية ما العجينة تتماسك مع بعضها وتتجانس، وبعد كده غطّيها كويس بقطعة قماش نضيفة، وسيبيها على جنب لمدة ساعة أو ساعتين علشان تتخمّر. 5- بعد كده هاتي العجينة وقطّعيها إلى 4 قطع متساوية، وافردي كل قطعة فيهم بإيدك بحيث تدّيكي شكل أسطواني رفيع، وابدئي ضفّريهم مع بعض بإيدك، وممكن تقطّعي العجينة بأي شكل إنتي عايزاه وتشكّليه بالطريقة اللي تحبّيها. 6- حطّي عجينة البريوش في صينية مدهونة بكمية صغيرة من الزيت وعليها طبقة خفيفة من الدقيق وغطّيها كويس، وسيبيها مرة تانية علشان تخمرّ لمدة ساعة ونصف، وبعد كده ادهني وشها بخليط من اللبن والبيض، ودخّليها الفرن على درجة حرارة 180 وسيبيها لمدة 25 : 30 دقيقة، وبعد كده طلّعيها وسيبي البريوش يبرد، وقدّميه.. وبالهنا والشفا.
وبكده تكون خلصت وصفتنا النهارده.. يا ريت تجرّبوها وتبعتوا تقولوا لنا على النتيجة.. واستنونا بكره مع وصفة جديدة.. سلاااااااام،،،
