النهارده هنقدّم طريقة جديدة لقلي الفيليه لكل أصدقائنا اللي طلبوا طرق جديدة لتقديم السمك.. علشان تقدري تنوّعي في أطباق السمك اللي بتقدّميها لأفراد أسرتك.. سمك كرسبي المقادير: * كيلو سمك فيليه مغسول ومصفّى * 3 أكواب كبيرة زيت ذرة لقلي السمك * 3 بيضات مخفوقين بالملح والفلفل * ملعقة صغيرة شطة حمراء * 1⁄4 كوب عصير ليمون * ملعقة كبيرة كمون * ملح وفلفل أسود * ثمرة فلفل أخضر * 5 فصوص ثوم * كوب بقسماط * كوب دقيق الطريقة: 1- لتحضير تتبلية السمك؛ افرمي الثوم مع الفلفل الأخضر والكمون والملح والفلفل الأسود والشطة الحمراء وعصير الليمون، وتبّلي السمك بالخليط ده، وسيبيه لمدة نص ساعة. 2- بعد كده حطّي السمك في الدقيق، وبعد كده حطّيه في البيض، وفي الآخر حطّيه في البقسماط، واضغطي بإيدك كويس على كل قطعة سمك، وبعد كده دخّليه في الفريزر لمدة 10 دقايق. 3- طلّعي السمك واقليه في الزيت لغاية لونه ما يبقى دهبي، وبعد كده ارفعيه على مناديل ورق علشان تتشرّب أي زيت موجود في السمك، ورصّيه في أطباق التقديم.. وبألف هنا وشفا. وبكده تكون خلصت وصفتنا النهارده.. يا ريت تجرّبوها وتبعتوا تقولوا لنا على النتيجة.. واستنونا بكره مع وصفة جديدة.. سلاااااااام،،،