السلام عليكم.. لو سمحت يا دكتور محمد أنا عندي مشكلة ونِفسي ألاقي لها حل، أنا عندي 24 سنة ومش باشتغل، وزني 118 كيلو وطولي 170 سم، ونِفسي أخس بجد. أنا بامشي على ريجيم كتير وباروح لدكاترة وباخس، وبعدين جسمي بيقف على وزن معين، علشان كده بازهق وأبطّل.. عايزة حل أو ريجيم ويا ريت لو كان قاسي. a&m الصديقة العزيزة.. الريجيم مش معناه إننا ناكل قليّل علشان وزننا ينقص، ولكن معناه نظام غذائي صحي وسليم بنتعوّد عليه مع مرور الوقت، وبالتالي بنقدر نحافظ على وزننا وصحتنا. وعموما عملية تقليل الوزن بتعتمد على استهلاك الجسم لسعرات حرارية أكبر من الكمية اللي الجسم بيستقبلها؛ يعني كل اللي بنحتاج له علشان نقلل وزننا إننا نقلل كمية الأكل، ونزوّد المجهود المبذول عن طريق ممارسة الرياضة. أما بالنسبة لموضوع ثبات الوزن مع الريجيم؛ فالحل إنك تراقبي نفسك ووزنك أسبوعيا مع تسجيل كل حاجة بتاكليها أو تشربيها في جدول، وتعرضيها على الدكتور اللي بيتابع معاكي الريجيم، وبالشكل ده هتقدري تعرفي إيه الغلط اللي بتعمليه وبيسبب لك ثبات الوزن، وماتنسيش أهمية اليوم الفري أو المفتوح في الريجيم؛ لأنك بالطريقة دي بتكسري الروتين اللي بيتعوّد عليه الجسم مع الريجيم لفترة طويلة، وبيرجع الجسم كأنه بيبدأ الريجيم من أول وجديد.
وبخصوص الريجيم القاسي، فده مفهوم غلط تماما؛ لأن مش معنى إن الريجيم يبقى صعب إنك هتخسّي أسرع، ولكن على العكس تماما لأن اتباع ريجيم قاسي وخسارة الوزن بشكل سريع سيتسبّب في خسارة الوزن من الكتلة العضلية، وده مش مفيد لخسارة الوزن؛ لأن الكتلة العضلية في الجسم هي الكتلة اللي بتسرّع عملية استهلاك الطاقة والسعرات الحرارية في الجسم. وعموما عليكِ بالمواظبة على اتباع الريجيم تحت إشراف دكتور متخصص مع ممارسة التمارين الرياضية اليومية زي المشي أو الجري، وشرب كميات كبيرة من الماء يوميا بمعدّل 8 أكواب تقريبا علشان تحافظي على بشرتك وعلشان تزوّدي من إحساسك بالشبع، مع تقسيم الأكل على 5 وجبات في اليوم، والإكثار من تناول الفاكهة والخضراوات الطازجة. ودايما خطّطي لأهداف صغيرة علشان لما توصلي لها تحسي إنك حققتي هدفك وبكده يبقى عندك قدرة على المواصلة.. مع تمنياتنا لكِ بالتوفيق والصحة.
