مشكلتي هي إني اتخطبت لشاب في بداية تعرفنا ببعض، كان بيعاملني بطريقة غريبة؛ فأحيانا يكون رقيق وأحيانا أخرى يستفزني، وأحيانا يوصّلني لمرحلة الانفجار، والمهم إنه في الآخر بيعرف إزاي يمتصّ غضبي، ولما سألته ليه بيعمل معايا كده؟ قال إنه لازم يعرّفني إن الإنسان وهو مستفز بيكون حقيقي، وهو عايز يشوف حقيقتي، وتفهّمت هذا.. وبدأنا نقترب ومع كل مرة يتأكد لي إن هذا الشخص المغامر والصديق والمجنون هو ما كنت أبحث عنه، وصرّح لي بأني حبيبته. والمشكلة إن كتب كتابي قرب.. وإحدى الأقارب قالت لي كلاما سيئا جدا عنه من أحد أقاربه، وأنا أعلم أن عائلته بينهم خلافات كبيرة على الميراث، وبعدما قالت لي ما يقوله عنه حاولت التأكد من صحته، ولكن كلما تمر لحظة يزداد يقيني بأن الله أهداني إياه لصدقه وإحساسه ورجولته.. فهل أسير خلف إحساسي وأكمل؟؟ أم أصدق قريبتي التي حذرتني منه وقالت عليه بيمثل عليّ؟؟! mahamounir {يَا أَيُّهَا الَّذِينَ آمَنُوا اجْتَنِبُوا كَثِيرا مِّنَ الظَّنِّ إِنَّ بَعْضَ الظَّنِّ إِثْم} في البداية عليكِ أن تحترمي صراحة خطيبك وخوفه على علاقتكما في المستقبل، وعايزاكي تعرفي إن الإنسان بطبيعته متقلب المزاج، وإنه خايف إنه لو مر بفترة صعبة في حياته إنتي هتستحمليه لو كان عصبي ولا لأ، بس ممكن يكون مش بيوصل لك الكلام بالطريقة الصحيحة.. كان المفروض إنه يتكلم معاكي ويفهمك إن الإنسان عامة بطبيعته متقلب المزاج، ومش صح إن الإنسان وهو مستفز بيكون حقيقي؛ لأن أي شخص مستفز أو متعصب مش بيكون في حالته الطبيعية وماينفعش تتعاملي معاه، ممكن يكون هو مش عارف يوصّل اللي جواه فعمل كده، وعليكي إنك تفهّميه إنك عارفة إن طبيعة الحياة بتخلي الإنسان مضغوط، وممكن يتصرف تصرفات تضايق، ولازم تعرفيه إنه مش محتاج يترفز عليكي عشان تشوفيه على طبيعته. صديقتي.. طمّنيه إنك دائما معاه وجنبه في كل حالاته، وإنك مش عايزاه يعمل كده تاني، والمفروض لما يكون عايز يفهمك حاجة عن شخصيته ممكن تتناقشوا فيها. أما بالنسبة بقى للكلام اللي بدأتي تسمعيه من قريبتك.. إنتي بتقولي إن كتب كتابك قرب، وفي نفس الوقت بتقولي إنك ماشوفتيش من الشخص ده حاجة وحشة، والمفروض إنه خلال فترة الخطوبة يكون مر باختبارات كتير، وبالنسبة لقريبتك إيه طبيعة الكلام اللي سمعته؟؟ وهي واثقة من الكلام ده؟؟ يعني عندها استعداد تقول الكلام ده قدامه، تذكّري الآية التي بدأت بها الحديث معكِ: {يَا أَيُّهَا الَّذِينَ آمَنُوا اجْتَنِبُوا كَثِيرا مِّنَ الظَّنِّ إِنَّ بَعْضَ الظَّنِّ إِثْم}، ويا ريت تتكلمي مع قريبتك، وتعرفي منها هو بيمثل عليكي إزاي يعني!! وهل التمثيل معناه إن كتب كتابك قرب، وإنه دخل بيتك وطلبك من أهلك هو ده التمثيل عليكي؟!! هدديها إن الكلام اللي بتقوله لك ده لو مش صح خطيبك هيعرف، وساعتها هتعرفي هي إيه نيتها، وبالنسبة للمشكلات اللي في عائلته من المشكلات المادية.. إيه المشكلة أصلا!! ماذا يعنيكِ أنتِ بخلافات بين عائلته على الميراث. صديقتي.. ابتعدي عن هذا التفكير تماما، وإنتي أكتر واحدة تعرفي شخصيته من خلال تعاملك معاه، وأنصحك بالابتعاد عن كلام الناس تماما، والحكم على الأشخاص من خلال تعاملك معهم.. أتمنى من الله أن يريح قلبك وفكرك قريبا إن شاء الله.