زمان ... أيوه زماااااااااااااااااان أيام حسني مبارك واللي قبله واللي قبله... كنا بننتخب أعضاء مجلس الشعب -ده اللي كان بيروح الانتخابات أصلا- عن طريق اختيار مرشحين بعينهم من بين ناس كتير مرشحة نفسها في الدايرة اللي إحنا ساكنين فيها... وكان بيحصل تزويييييير... وتعالوا نشوف الدليل...
إضغط لمشاهدة الفيديو: الانتخابات المرة دي مختلفة... علشان حاجتين: الأولى: إنها انتخابات بعد الثورة.. يعني لازم كلنا نشارك فيها بإيجابية ونساعد على إنها تنجح... الحاجة التانية: إن النظام الانتخابي المرة دي حاجة جديدة.. أول مرة تحصل في مصر.. والنظام ده اسمه.. النظام الانتخابي المختلط...
ومن اسمه كده مختلط؛ يعني بيجمع بين نظامين.. النظام الأول اسمه "النظام الفردي".. والنظام التاني اسمه "نظام القوائم النسبية"...
خليك معانا وواحدة واحدة هنشرح مع بعض ومش هنسيبك غير وانت فاهم كل حاجة.. لأنك لازم تفهم كل حاجة...
مجلس الشعب اللي جاي هننتخب تلته بنظام وهننتخب التلتين الباقيين بنظام تاني... يعني إيه برده؟ يعني لما تروح لجنة الانتخابات وانت شايل بطاقتك الشخصية، القاضي في اللجنة هيدّي لك ورقتين علشان تعلّم عليهم؛ واحدة منهم تختار منها المرشحين بصورة فردية.. وواحدة تعلّم فيها على القايمة اللي انت عاوز تديها صوتك...
هتقول لي يا عمنا ما أنا عارف... إيه بقى قصة فردي وقايمة دي؟ هاقول لك سهلة جدا وهتقدر تفهمها ببساطة... النظام الفردي هو النظام اللي إحنا معظمنا عارفينه... واللي هو إزاي يعني؟؟؟ هو يا سيدي إن مجموعة من الناس ترشح نفسها في الدايرة اللي انت ساكن فيها.. كويس.. وانت تختار من الناس دول اتنين بس... أيون اتنين بس.. واحد منهم عمال والتاني فئات.. وينفع تختار اتنين عمال.. لكن ماينفعش أبدا تختار الاتنين فئات.. وده علشان نحفاظ على إن مجلس الشعب يكون 50% من أعضائه من العمال والفلاحين..
هو ده النظام الأول... يعني لما تدخل لجنة الانتخابات هيدوا لك ورقتين.. ورقة منهم مكتوب فيها أسماء الناس اللي مرشحة نفسها فردي.. ودي زي ما قلنا هتعلم فيها علامة (√) على اسمين واحد منهم عمال والتاني فئات.. تمام؟ الورقة التانية بقى اللي هتاخدها هتعلم فيها علامة (√) على قائمة فيها عدد من المرشحين.. طب يعني إيه نظام القايمة ده؟ وبنتختار إزاي قايمة بالأسماء اللي فيها؟ ومين اللي بيفوز في القوايم دي؟ ده كله هنعرفة الحلقة الجاية اللي هنشرح فيها ببساطة معنى نظام الانتخابات بالقائمة النسبية..