أولاً أحييكم على الموقع الجميل ده، وأنا من أشد الناس المعجبين به؛ وخصوصاً باب سؤال محيرني. أنا خاطب وبحب خطيبتي أوي، وهي كمان بتحبني جداً.. مشكلتي إن أنا حساس جداً، وعايزها تهتم بي زيادة عن اللزوم. مشكلتي إن خطيبتي بتسافر مع أهلها، مش باعرف أتكلم معاها زي الأول، وكل ما بنتكلم نقفل بسرعة، ويقعدوا يندهوا عليها؛ فبازعل من ده أوي، وباحس إنها مش بتحاول تكلمني بشكل يرضيني.. حتى لو رحت لها هناك مش باعرف أقعد معاها، ومش بالحق، ويقعدوا ما بينّا على طول. ومن كام يوم كنت باكلمها على الموبايل رنّ تليفون البيت، وقفلت معايا قبل ما أكمل المكالمة، وماكلمتنيش غير بعد كام ساعة، ولما سألتها قالت لي: ماكنتش فاضية! طب ليه ماتفضاش علشاني أنا كمان؟ أنا عارف إنها بتحبني؛ بس هي خجولة جداً ومش بترضى تزعّل قرايبها منها؛ طب وأنا فين؟ أنا بادعي ربنا أتجوز علشان أبطّل الإحساس ده، أنا عايز حلّ علشان ماحسش بعدم الاهتمام؛ لأني أول ما باسمع إنها هتسافر باتعب وباتخنق جداً، هي بتقول لي: إنت عندك حب امتلاك.. أنا مش كده، أنا عايز أحس إن أنا كمان زيهم ليّ الحق أوصل لها في أي وقت، وتسيب اللي وراها علشان تكلمني في التليفون، ولو حصل وقفلِتْ لسبب، عايزها أول ما تخلّص تكلمني. أنا بحب أكلمها على طول، بتوحشني بسرعة..بس هي قالت لي: أنا عايزاك توحشني، عايزة أبقى ملهوفة عليك، ماتكلمنيش على طول، أنا حابة أحس كده. أنا عايز حلّ علشان أنا عايزها تبقى مبسوطة وهي مسافرة، وأبقى أنا كمان مبسوط، ماحسش إنهم أخدوها مني.