السلام عليكم.. الأول أحب أشكر الموقع على كل حاجة فيه، بجد أنتم موقعكم جامد موت. أنا طالب في إحدى كليات القمة، من حوالي سنة اتعرّفت على واحدة من النت. واتكلمنا مع بعض حوالي 3 شهور على النت بس، وبدأت أعجب بيها وبطريقة كلامها وأسلوبها، بعدها إحنا الاتنين اتكلمنا في حاجات ماكانش ينفع نتكلم فيها، ومثّلنا اللقاء الزوجي بس بالكلام بس. وبعدها اعترفنا إننا غلطنا، وماينفعش نتكلم في كده تاني، واتفقنا إننا نقرّب من ربنا، وبقينا بنحافظ على الصلاة على طول.. وكل يوم بحبها أكتر، وقابلتها أكتر من مرة، واتفقنا إننا نكمّل مع بعض. بس أنا كل ما أفتكر الكلام اللي اتكلمنا فيه باتعذب وباقول لنفسي إني ماينفعش أعرفها، وساعات باقول هي محترمة، وعملت كده مرة واحدة، وندمت زيي عليها.. لأني كنت أول مرة أعمل كده أنا كمان. وعلى فكرة، هي إدتني كل إيميلاتها والباسووردات بتاعتها عشان أتأكد إنها مش بتكلم حد في كده. أنا حاسس إني مصدّقها بس مش عارف أعمل إيه.. يا ريت تساعدوني.