أنا مشكلتي إني كنت بحب واحد أوي لمدة خمس سنين، أنا عندي 20، وهو أكبر مني بسنة؛ بس هو بيطلب مني أعمل له فيديوهات أعرض فيها جسمي، ولما باقول لأ، بيبعد عني، وأنا باقعد أعيّط لأني باحسّ إني ماليش غيره، وباعمل اللي هو عايزه.. ويرجع يقول عاوز تاني، وأنا أبعد، وإحنا كده على طول. هو بيقول إنه بيحبني علشان كده عاوز يتفرج على مراته في المستقبل.. خايفة أكون هبلة؛ بس أنا لما بابعد عنه بجد باقعد أعيط، وهو برضه بيعاملني أحياناً وحش، ومابيهتمش لكلامي. أنا تعبانة أوي، كل شوية أبعد عنه شهر وأرجع تاني، بافكّر أحب غيره علشان أنساه؛ بس خايفة أدخل في دوامة ماخرجش منها، وفي نفس الوقت مش عارفة أبطّل أحبه.. عاوزة حد يقول لي إنه بيكرهني علشان أنا باكدّب نفسي، وأقول إنه يمكن بيحس إنه عاوز يشوفني علشان بيحبني.