النهارده هنقدّم لكم عزومة مكوّنة من: عصير التفاح بالصودا، وسلطة جرجير بالنعناع والسماق، وشوربة تشاودر، وطاجن السمك بالبطاطس، وموز بالمارينج... عصير التفاح بالصودا المقادير: * 7 تفاحات * 2 كوب صودا * عصير 2 ليمونة * سكر على حسب الرغبة الطريقة: اضربي كل المكونات في العصارة، وبعد كده صفّي العصير، وصبيه في كوبايات التقديم، وممكن تزيّني الكوبايات قبل التقديم بشرائح التفاح.. وبالهنا والشفا.
*******************
سلطة مفيدة ومناسبة مع المأكولات البحرية سلطة جرجير بالنعناع والسماق المقادير: * ثمرة بصل مقطّعة شرائح رفيعة * 3 ملاعق كبيرة سماق "هتلاقيه عند العطار أو في أي سوبر ماركت" * 3 كوب أوراق جرجير * 2 كوب أوراق نعناع * ثمرة فلفل برتقالي مقطّعة شرائح * 3 ملاعق كبيرة عصير ليمون * 3 ملاعق كبيرة زيت زيتون الطريقة: 1- اخلطي البصل مع السماق في طبق غويط، وافركيهم كويس بإيدك. 2- حطّي الجرجير والنعناع والفلفل في طبق التقديم، وضيفي عليهم خليط البصل، ورشّي عليهم زيت الزيتون وعصير الليمون.. وبالهنا والشفا.
*******************
شوربة أمريكية لذيذة ومفيدة جداً شوربة تشاودر الشوربة دي شوربة أمريكية، وهي شوربة بالبحريات، لذيذة ومفيدة جداً، وكمان طريقتها سهلة... المقادير: * 2 ملعقة كبيرة زبدة * 4 كوب بصل مفروم * 1/2 كوب كرفس مفروم * كوب كرَّات مفروم * 2 ملعقة كبيرة دقيق * 6 أكواب شوربة سمك * 2 ثمرة بطاطس متوسطة ومقطّعة مكعبات * 1/2 كيلو سمك فيليه مقطّع مكعبات * كوب جمبري صغير بدون قشر * كوب قطع سبيط * كوب جندوفلي * كوب لبن * ملح وفلفل أبيض الطريقة: 1- سخّني الزبدة على نار متوسطة، وبعد كده ضيفي عليها البصل والكرفس والكرَّات مع التقليب لمدة 5 دقائق، وبعد كده ضيفي عليهم الدقيق، مع التقليب المستمر لمدة دقيقتين. 2- بعد كده ضيفي الشوربة مع الاستمرار في التقليب؛ علشان الشوربة ما تكلكعش منك. 3- بعد كده ضيفي البطاطس والسمك والجمبري والسبيط والجندوفلي، وضيفي الملح والفلفل، وسيبي الخليط على النار لمدة 15 دقيقة أو لغاية ما المكونات كلها تستوي. 4- ضيفي اللبن للشوربة، وسيبيهم لمدة دقيقتين على النار، وقدّميها وهي سخنة، وممكن تقدّمي معاها عيش محمّص.. وبالهنا والشفا.
*******************
كفتة السمك بطريقة جديدة طاجن السمك بالبطاطس المقادير: * 1/2 كيلو سمك مفروم ناعم * 2 ثمرة بطاطس كبيرة ومُقشرة ومقطّعة حلقات * 2 ملعقة كبيرة زيت زيتون * بصلة كبير مقطّعة شرائح * ملعقة كبيرة عصير ليمون * ملعقة كبيرة بقدونس مفروم * ملح وفلفل * 2 ثمرة طماطم مقطّعة حلقات لتحضير العجين * 2 كوب دقيق * 1/2 كوب زبدة * 2 ملعقة كبيرة بقدونس مفروم * ملعقة صغيرة بيكينج باودر * 2/3 كوب لبن * ملح وفلفل الطريقة: 1- حمّري البطاطس في الزيت لغاية ما لونها يبقى ذهبي، بس خلّي بالك إنها ماتستويش أوي. 2- هاتي طاسة وسخّني فيها زيت الزيتون على نار متوسطة، وبعد كده ضيفي عليه البصل وسيبيه لمدة 3 دقائق مع التقليب لغاية ما البصل يبقى طري ولونه يبقى ذهبي، وبعد كده ارفعيه من على النار. 3- هاتي طبق غويط، وحطي فيه السمك وعصير الليمون والبقدونس والملح والفلفل، وقلّبي الخليط كويس مع بعضه لغاية ما يتجانس، ويبقى عجينة سهلة التشكيل. 4- هاتي القالب اللي هتعمليه فيه وادهني قاعدته بكمية صغيرة من زيت الزيتون، ورصّي فيه حلقات البطاطس والبصل والطماطم، وبعد كده افردي عليهم عجينة السمك، ودخلي القالب في فرن ساخن عى درجة حرارة 180 وسيبيه لمدة 20 دقيقة. 5- في الوقت ده ابدئي حضّري العجينة، بإنك تخلطي كل مكوناتها مع بعض، وتضيفي عليها كمية مناسبة من الملح والفلفل، وقلّبيهم كلهم مع بعض لغاية ما كل المكوّنات تتجانس وتختلط ببعض كويس. 6- طلّعي القالب من الفرن، وافردي عليها العجينة وساوي السطح، ورشّي عليه كمية صغيرة من زيت الزيتون، ودخليه الفرن مرة تانية، وسيبيه لمدة 15 دقيقة أو لغاية ما الوش يبقى لونه ذهبي.. وبالهنا والشفا.
*******************
ممكن تقدّمي معاه صوص الكراميل الموز بالمارينج المقادير: * 6 ثمرات موز كبيرة مقطّعة شرائح * باكيت بسكويت كبير "بالفانيليا أو سادة" * 3/4 كوب سكر * 1/3 كوب دقيق * 1/4 ملعقة صغيرة ملح * صفار 4 بيضات كبيرة * 2 كوب لبن * ملعقة صغيرة فانيليا * ملعقة صغيرة بشر برتقال أو ليمون لتحضير المارينج * بياض 4 بيضات * 1/2 كوب سكر الطريقة: 1- هاتي طبق عميق واخلطي فيه السكر والدقيق والملح وصفار البيض واللبن والفانيليا وبشر البرتقال أو الليمون، واضربيهم مع بعض بالمضرب على حمام مائي ساخن على نار متوسطة، واستمري في التقليب بالمضرب لغاية ما الخليط يبقى سميك، ويبقى قوامه زي الكسترد، وبعد كده سيبيه شوية علشان يبرد. 2- هاتي الصينية أو القالب اللي هتعملي فيه، وافردي في قاعدته كمية صغيرة من الكسترد، ووزعي بعض قطع البسكويت على جوانب القالب، وحطي بعض شرائح الموز فوق طبقة الكسترد، وبعد كده افردي طبقة تانية من البسكويت وافردي عليها شرائح الموز وفي النهاية ضيفيي الكسترد، واستمري على كده لغاية ما تخلصي كل كمية البسكويت والكسترد والموز. 3- لتحضير المارينج، اضربي بياض البيض بالمضرب على سرعة متوسطة لغاية ما تحسي إن كميته زادت وبقى عامل زي الكريمة، وبعد كده ضيفي السكر مع الاستمرار في الخفق، لغاية ما تلاقي المارينج اتكوّن وبقى عامل زي الكريمة، وبعد كده افردي طبقة المارينج على الكسترد الموجود في القالب اللي هيدخل الفرن. 4- دخّلي القالب في الفرن وسيبيه لمدة 10 - 15 دقيقة لغاية ما السطح يبقى لونه ذهبي.. وبعد كده قدّميه وممكن تقدّمي معاه صوص الكراميل.. وبالهنا والشفا.
وبكده تكون خلصت عزومتنا النهارده أتمنى إنها تكون عجبتكم وتجرّبوا كل الوصفات اللي قدّمناها وتبعتوا تقولوا لي النتيجة كانت إيه ********************* للتعرف على مزيد من الوصفات الشهية اضغط هنا "سفرة دايمة" *********************
