أنا حالياً طالبة بالكالوريوس؛ لكن قصتي بدأت وأنا في سنة أولى تقريباً.. هو واحد بيحبني أوي، وما اتكلمش إلا لما فاض بيه، جالي وقال لي بحبك، وفهّمته إني مش بتاعة لعب ولا تسلية وإني بحب الإنسان اللي قدامي يقدّرني، مش عاوزة أتسلى. المهم إنه قال لي: أخلّص وآخد الشهادة وآجي أخطبك، مش هاسيبك.. والكلام الفاضي ده يعني.. المهم أنا فهّمت والدتي وعرّفتني الصح من الغلط في الحوار كله. أنا بصراحة حبيته أوي؛ بس المشكلة إني جت عليّ لحظة وسألته أنا وضعي معاك إيه بعد التخرّج؟ ردّ وقال لي: أنا مش هاقدر أقف في طريق حياتك، ولازم أكوّن نفسي، ويبقى معايا شغل عشان أعرف أتقدم ليكِ. عرفت إن قراره الأول والأخير إنه يسافر ويحقّق أحلامه رقم واحد في حياته، بعد كده بدأت أزعل أوي إني حبيته.. المشكلة إني عاوزة أتصرف، ويكون التصرّف بتاعي صح. أنا كل ما أفكر إني حبيبته أزعل أوي.. أنا حالياً باحاول جامد ما أرنّش عليه ولا أتصل بيه ولا أسال عليه عشان حسيته ما يستاهلش. أنا عاوزة حل وتصرف يكون صح، معلش طوّلت عليكم.. وشكراً.