أنا مش عارفة أبدأ منين.. بجد محتاجة ردكم أوي، أنا مرتبطة بإنسان فيه كل الصفات اللي كنت فعلاً باتمناها. أنا عمري ما كنت حاطة الحب في دماغي يعني جه جه ما جاش خلاص، ما فيش مشاكل، لحد ما ظهر هو في حياتي. حياتي اتغيرت خالص للأحسن طبعاً؛ بس للأسف حصل مشاكل عندي في البيت لما بدءوا يلاحظوا عليّ التغير، وكمان مكالمات التليفون الكتير اللي بتيجي لي؛ فقررت أبعد عنه فترة؛ بس ما قدرتش؛ فهو علشان يريّحني ويساعدني في المشاكل دي قال لي إنه يقابل ماما بره البيت ويشرح لها ظروفه، وإنه مستني الجيش لما يخلّص وهو ده اللي معطله. بس أنا لما حسبتها ولأني عارفة ماما لقيت إنها مش هتقتنع بكلامه؛ إلا إذا جاب أهله وجه البيت، وهتفرض الحصار عليّ كمان مع إني ما باشفهوش إلا كل فين وفين؛ لأنه بيخاف عليّ جداً؛ خصوصاً بعد المشاكل دي؛ فأنا رفضت إني أفاتح ماما وقلت له سيبها لحد لما تخلّص الجيش بتاعك لأنه تقريباً مجهّز كل حاجة. المشكلة بقى دلوقتي إني لما باشوفه طبعاً بيكون بره في مكان عام؛ يعني أنا لسه بادرس في الجامعة، وهو مخلّص، ليّ واحدة زميلتي عمالة تخوّفني وتقول لي إنه هييجي بعد كده ويعايرني إني كنت باخرج معاه. أنا أول مرة أحب في حياتي، وكل تصرفاتي معاه جاية بتلقائية؛ حتى هو دايماً يقول لي كده؛ إنه بيحس إني بريئة أوي وإنه متأكد مليون في المية إن عمري ما خرجت مع حد. ولما قلت لها كده قال لي عادي كلهم لازم يقولوا كده. أنا بجد محتارة، يا ريت تردوا عليّ ومعلش طوّلت عليكم. sweet egypt
