أعدّها لكم: نيرة أحمد النهارده هنعمل مع بعض كفتة باردة محشية ليكي ولأسرتك، وممكن تقدّميها طبق جانبي في الغداء. كفتة باردة محشية المقادير: كيلو لحمة مفرومة بصلة مفرومة (أو بودرة بصل) 2 ملعقة كبيرة بقدونس ملح وفلفل أسود توابل بيضة (ملحوظة: تقدري تختاري نوع التوابل اللي إنتي عاوزاها؛ سواء كانت توابل عادية أو توابل كفتة). مقادير الحشو: كوب بسلة وجزر (الجزر مقطّع لقطع صغيرة) 3 بيضة مسلوقة مقطّعة لأنصاف الطريقة: 1- ضيفي على اللحمة المفرومة التوابل والبقدونس والبيضة والملح والفلفل الأسود، واعجنيهم مع بعض بإيديكي كويس. 2- افردي اللحمة على ورقة زبدة بحيث تكون شكلها مربع، ابدئي رصّي البيض المسلوق عليها من نهاية اللحمة بالعرض، وبعد كده افردي عليها البسلة والجزر. 3- ابدئي لفّيها من نهايتها على شكل أسطواني (باستخدام ورقة الزبدة)، وبعدين حطّيها في صينية، ودخليها فرن درجة حرارته 140 درجة مئوية لمدة 30 دقيقة. 4- طلّعي الصينية من الفرن وشيلي ورقة الزبدة من اللحمة (مع الاحتفاظ بشكلها الأسطواني)، ودخّليها الفرن مرة تانية لمدة 30 دقيقة، وبعد كده طلّعيها من الفرن وحطّيها في الثلاجة لمدة ساعتين أو لحد وقت التقديم، وطلّعيها وقطّعيها شرائح، وقدّميها.. وبالهنا والشفا.
خلصت وصفتنا النهارده.. استنونا كل يوم مع وصفات جديدة.. سلام،،