يوم الجمعة بتحلى اللمة على الأكل.. علشان كده حبينا نشاركك اللمة الحلوة دي.. ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا.. ونقدّم لك كل يوم جمعة اقتراح لعزومة مكوّنة من العصير والطبق الرئيسي وطبق السلطة وطبق الحلو.. علشان تنوّعي لعيلتك.. وتبهريهم بأكلاتك الجامدة.. تعالي بقى نشوف هنعمل إيه النهارده.. ***************** أحلى عصير في الصيف عصير الشهد المقادير: ثمرة شهد متوسّطة كوبين ونصف مية 1/4 كوب لبن كوب وربع سكر عصير 2 ليمونة الطريقة: 1- قشّري الشهد وشيلي البذر وقطعيه لقطع صغيرة. 2- حطي السكر والمية على نار متوسطة، وأول ما تحسي إن المية بدأت تغلي ضيفي عصير الليمون وسيبيهم على النار لمدة 5 دقايق، وبعد كده ارفعيه من على النار وسيبيه يبرد. 3- اضربي الشهد في الخلاط مع اللبن، وبعد كده ضيفي الشربات، وامزجيهم مع بعض كويس في الخلاط وقدميه مثلج.. وبالهنا والشفا. ***************** طبق سلطة خفيف سلطة الخيار بالزبادي المقادير: كوب زبادي ثمرة خيار ربع معلقة كبيرة نعناع ناشف مطحون ملح الطريقة: 1- ابشري الخيار أو قطعيه لقطع صغيرة حسب رغبتك. 2- ضيفي الخيار للزبادي ومعاه النعناع الناشف والملح وقلبيهم مع بعض، وقدميها باردة.. وبالهنا والشفا. ***************** ممكن تزيني الشوربة بالبقدونس شوربة البسلة المقادير: 2 كوب حبوب بسلة 2 لتر ونصف ماء عود كرفس ثمرة جزر ثمرة بصل ثمرة بطاطس بقدونس "للتزيين" الطريقة: 1- انقعي حبوب البسلة لمدة ليلة كاملة. 2-قطعي البصل والجزر والكرفس والبطاطس إلى قطع صغيرة جداً. 3- اغلي البسلة مع قطع الجزر والكرفس وسيبيهم على النار لغاية ما تحسي إن البسلة استوت وبقت طرية. 4- بعد كده ضيفي قطع البطاطس وسيبيهم لغاية ما تحسي إن الخضار كله بقى طري، وبعد كده اضربيهم في الخلاط لغاية ما تحسي إن الخليط بقى ناعم جداً. 5- صفي الخليط كويس وحطيه مرة تانية على النار وسيبيه لغاية ما يسخن، وعند التقديم حطيها في أطباق الشوربة وممكن تزينيها بالبقدونس.. وبالهنا والشفا. ***************** طبق فراخ جامد فراخ محشية أرز ولحمة مفرومة المقادير: فرخة كاملة "وزنها حوالي كيلو" 1/2 كوب أرز 1/8 كيلو لحمة مفرومة 1/2 كوب زيت معلقة كبيرة صنوبر معلقة كبيرة فستق أو لوز "اختياري" معلقة كبيرة دقيق معلقة صغيرة ملح معلقة صغيرة قرفة معلقة صغيرة فلفل أسود حبهان مطحون 2 ورقة لاورا الطريقة: 1- أحضري الفرخة واغسليها كويس، وتبليها بالدقيق ونصف كمية الفلفل الأسود والحبهان المطحون والقرفة. 2- سخني الزيت وحمّري فيه الصنوبر، وبعد كده طلعيه وحطي الفستق أو اللوز وسيبيه يتحمّر وطلعيه. 3- حطي اللحمة المفرومة في نفس الزيت، وضيفي عليها الملح وباقي كمية التوابل اللي عندك، وقلّبيهم مع بعض على النار، وأوّل ما تحسي إن اللحمة استوت ضيفي عليها كوبايتين مية. 4- ضيفي الأرز على اللحمة المفرومة، وقلّبيهم مع بعض وسيبيهم على نار هادية لغاية ما تحسي إن الأرز شرب المية واستوى. 5- بعد كده ضيفي الصنوبر والفستق على الأرز، واحشي الفرخة بالأرز ده، وبعد كده خيطيها، أو اقفليها بعيدان الخشب. 6- حطي الفرخة المحشية بالأرز في حلة على النار، وضيفي عليها كوبايتين مية وورق اللاورا، ولما تلاقي المية بتغلي غطي الحلة، وسيبيها على نار هادية لمدة 40 دقيقة. 7- بعد كده حطي الفرخة في صينية الفرن، ودخليها الفرن على درجة حرارة عالية وسيبيها لغاية ما وشها يتحمّر وبعد كده قدميها.. وبالهنا والشفا. ***************** المشمش من الفواكه المفيدة جداً فطيرة المشمش بالكاسترد مقادير العجينة: 2 كوب دقيق 2 بيضة 3/4 كوب سكر ذرة ملح 10 معالق صغيرة زبدة طرية مقطعة لقطع صغيرة معلقة كبيرة ماء مثلج مقادير الكاسترد: صفار 3 بيضات 1/4 كوب سكر كوب لبن 1/2 معلقة صغيرة فانيليا 10 ثمرات مشمش الطريقة: 1- لتحضير العجينة اخلطي الدقيق والسكر والملح في العجانة مع بعض وقلبيهم كويس مع بعض.
2- بعد كده ضيفي البيض والزبدة ومعلقة المية المثلجة تدريجياً، واعجنيهم مع بعض في العجانة أو اعجنيهم بإيدك كويس لغاية ما كل المكونات تمتزج ببعضها وتلاقي العجينة تماسكت مع بعضها وكوّنت كورة متماسكة. 3- لفي العجينة في كيس بلاستيك، وحطيها في الثلاجة لمدة ساعة أو لغاية ما تحسي إن العجينة بقت متماسكة. 4- بعد كده طلعي العجينة وافرديها في صينية أو قالب مفروش بالدقيق، وراعي إنك تبطني القالب من كل جوانبه بالعجينة، وبعد كده شيلي العجينة الزيادة. 5- حطي ورق المونيوم على سطح العجينة، وحطي عليه أي جسم تقيل، ودخلي القالب في فرن ساخن وسيبيه لمدة 10 أو 15 دقيقة. 6- بعد كده طلعي القالب وشيلي ورق الألمونيوم والجسم التقيل اللي كنتِ حطاه، ودخلي القالب مرة تانية في الفرن وسيبي العجينة تتخبز لمدة 5 دقايق. 7- لتحضير الكاسترد، حطي حلة فيها كمية مية على النار، ولما المية تسخن حطي وعاء تاني فوق المية، وابدئي اضربي فيه صفار البيض مع السكر. 8- بعد كده ضيفي اللبن على البيض واستمري في التقليب لمدة 20 دقيقة، لغاية ما تحسي إن الخيط بقى سميك وبعد كده ضيفي الفانيليا. 9- ارفعي الخليط من الحمام المائي الساخن، وحطيه في حمام ماء مثلج لغاية ما الخليط يبرد. 10- افردي الكاسترد فوق الفطيرة، وساوي السطح بالسكينة، وبعد كده قطعي المشمش لنصفين وشيلي منه النوى، ووزّعي المشمش المقطع على سطح الفطيرة والكاسترد، وبعد كده دخلي الفطيرة مرة تانية للفرن على درجة حرارة متوسطة وسيبيها لمدة 15 دقيقة وبعد كده طلعيها وقدميها.. وبالهنا والشفا. وفي النهاية نتمنّى إن عزومة النهارده تكون عجبتِك.. وتجرّبي كل الوصفات وتبعتِ تقولي لنا على النتيجة.. وكمان لو عندك وصفة حلوة عايزة تشتركي بها معانا.. ممكن تبعتيها لنا على لينك... "ورينا شطارتِك" وإلى اللقاء في العزومة الجاية،،،
