أعدها لكم: نيرة أحمد النهارده هنعمل مع بعض سلطة البطاطس بالزعتر، وممكن تقدّميها كطبق جانبي مع الغداء. سلطة البطاطس بالزعتر المقادير: 1⁄2 كيلو بطاطس 2 ملعقة كبيرة ثوم مفروم 1⁄4 كوب زيت زيتون 2 ملعقة كبيرة زعتر ثمرة فلفل أخضر ملعقة كبيرة خل ملح وفلفل أسود الطريقة: 1- اغسلي البطاطس واسلقيها بقشرها، وبعد كده قطّعيها مكعبات (من غير ما تشيلي القشرة). 2- حمّري الفلفل الأخضر في الزيت على النار، وبعد كده حطّيه في كيس بلاستيك واقفليه لمدة 5 دقائق، وبعد كده شيلي منه القشرة والبذر وقطّعيه قطع صغيرة. 3- امزجي زيت الزيتون مع الخل وسيبيه على جنب، وبعدين قلّبي البطاطس والثوم والزعتر والفلفل، وضيفي عليهم خليط الزيت بالخل واستمرّي في التقليب. 4- ضيفي عليهم الملح والفلفل الأسود، وقلّبيهم كويس مع بعض، وبعد كده دخليه الثلاجة لمدة ساعتين، وقدّميها.. وبالهنا والشفا. خلصت وصفتنا النهارده.. استنونا كل يوم مع وصفات جديدة.. سلام،،