كنت زمان لما أشوفها أحس إنى طاير من غير جناحات الخدود كان لونها وردى والشفايف عليها مرسومه الإبتسامات بعد كام سنه بعد ما إفترقنا وكل منا تاه وسط الزحام الأيام بينا جريت قطر الزمان خدها وولت أخدت معاها شبابنا ما سابت لينا غير عذاب آلامنا وراحت فى يوم كنت مستنى قطر الزمان يهدى يمكن ألاقى بين ركابه حبيبتى سمعت صوت بيندهلى إركب تعالى أنا هنا يا حبيبى بس يا خساره مكنتش بعنيا شايف ركبت القطر أفتش بإديا على الوشوش بحسس وأصرخ بأعلى صوتى إنتى فين يا حبيبتى الناس لما شافتنى كفيف بيدور على حد تايه سخروا منى وقالوا عيب يا جدى دا إنت خطوه والتانيه للقبر رايح هو إللى زيك لسه عايش أتارينى ركبت قطر تانى وحبيبتى كانت راكبه قطر رايح وكانت دى نهايتى ودى آخر حكايتى راحت أيامى وراحت حبيبتى وأنا لسه واقف ومعايا عصايتى هى إللى باقيه بتساعدنى على خطوه باقيه لعمر رايح