بقلم : صالح شيحة شفت الشعب المصرى دايماً بيغلط فى الناس الصح ...اللى زى عمه الزند ...الراجل عشان طلع فى مؤتمر صحفى قال كلمتين حلوين ...وغلط فى مجلس الشعب ...الدنيا قامت عليه ...كأنه غلط فى البخارى ...اللى يقولك عليه ده قاضى التوريث مع إن الحقيقة مش كده ده كان حاجب محكمة إسمه حاجة عضمة اللى كان ماسك ملف التوريث دايماً فى إيده لأننا متأكدين إن القضاء مش محتاج لتطهير لأن مفيش قاضى أكيد يعنى مفيش فى بيته حمام يبقى اللى بيقول القضاء محتاج تطهير هو اللى معندوش حمام فى بيته وبيروح الحمام فى الجامع ... واللى بيقولك الزند بيعمل دعاية لشفيق وواخد أمر من المجلس العسكرى ...أنا ضد الرأى ده لأن شفيق مش محتاج لدعاية الراجل غرقان فى إنجازاته ...طب أنا هقولكم على سر ما قالوش ليكم الإعلامى الكبير توفيق عكاشة إنتوا تعرفوا إن شفيق إختلف مع مبارك وحصل بينهم مشادة كلامية بسبب نوع البنبونى اللى كان هيجيبه للثوار ...مبارك كان عايز يجيب نوع عادى وشفيق أصر على كوفرتينا ... أحب أقول لللى بيقولوا على نفسهم ثوار ونشطاء سياسيين الشعب المصرى واعى ومش هيصدقكم ... الشعب المصرى زى ما محمد مرسى قال محدش يقدر يخدعه ... لتكون فاكرين إن الشعب المصرى زى أهل المدينة اللى دخل عليها محتال وزوجته ليمارسا أعمال النصب والإحتيال على أهل المدينة ....أول حاجة إشترى حمار وملا فمه بدينارات من الذهب رغماً عنه ...وأخذه إلى حيث تزدحم الأقدام فى السوق ...ولما نهق الحمار تساقطت النقود من فمه فتجمع الناس حول المحتال الذى أخبرهم أن الحمار كلما نهق تساقطت النقود من فمه ...فإتخانقوا طبعاً على الحمار ...والشعب المصرى مش زى أهل المدينة دى ... [Share/Bookmark]