فلان: يا أخي الشعب المصري ده زي العسل حتي الاخوة الحرامية عندنا دمهم شربات علان: حد سرق منك "نكتة"؟ فلان: اللي حصل هو في حد ذاته نكتة. علان: ضحكنا معاك في وسط الغم اللي احنا فيه.. ينوبك ثواب فلان: واحد مزنوق في توصيلة سرق اتوبيس نقل عام عشان يروح بيه علان: وهو لمؤاخذة الاتوبيس معمول ليه؟ فلان: معمول للناس علان: والراجل ده عمل زي الناس! فلان: باقوولك سرق اتوبيس.. مش دخل الحمام!! علان: يا سيدي عارف.. الراجل استني المواصلات ولما غلب حماره.. لقي اتوبيس قدامه أخده وشرخ فلان: لكن اسمها سرقة! علان: هو واخده توصيلة.. مش عشان يشغله بالنفر! فلان: والنتيجة.. بدل ما وصل بيتهم عشان يرتاح.. أهو هيريح في التخشيبة.. ويا عالم هينزل في أي محطة!!