بصراحة مش عارف ابتدي منين مبدائيا اكيد الكل مستغرب انا لية بكتب باسلوب العامية مع اني دايما بكتب بالفصحى انا هقولكم اصل في ناس مبتحبش الفصحى لية انا مش عارف مع ان هو ده الطبيعي ان احنا نكتب بالفصحى فقلت مش مشكلة انزلهم انا المرة دي . طبعا مرت علينا احداث كتيرة جدا جدا وانا كنت ناوي اتكلم عنها كلها بس عشان اتكلم عنها محتاج مجلة لوحدي. فقلت اكتب واسلط الضوء على كام حدث كدة ، ممكن ترجعوا معايا لورا شوية فاكرين حكاية النقاب والمشاكل دي . اول حاجة انا مش بدعي مهنة الافتاء وانا مش هقول النقاب فرض ولا فضيلة بس هقول حاجة تالتة خالص . بعد الحروب الكلامية بين رجال الدين المؤيدين والمعارضين ( ختوا بالكم من كلمة رجال الدين انا قصدتها عشان كلمة شيخ في اللغة تعني كبير السن ) نكمل كلامنا بعد الحروب دي شفت حاجة غربية جدا شفت بعض من اللي لابسين نقاب لابسين الجزء اللي بيغطي الرأس واسع ولونه فيه احترام ، بس بس باقى الزي لونه بمبى وبنفسجي وساعات بشوف الزي مجسم ، طب ده كلام ينفع وللاسف بشوف في الفترة الاخيرة شحاذات بالنقاب . اعتقد ان النقاب ده زي اسلامي له وقاره يعني اللي تلبسه لازم تحترمه ولا تخلعه احسن . وبعد كدة جه علينا المولد النبوي الشريف واكيد كلكم سمعتم القتاوى بس انا في حاجة عايز اقولها لية رجال الدين بيحرموا حاجات عشان طرق الاحتفال بها غلط يعني انا ممكن احتفل بالمولد وانا قاعد في بيتنا مع اهلي واحكي ليهم قصص عن الرسول (صلى الله عليه وسلم ) وسبحان الله جه اليوم ده يوم الجمعة واحنا عارفين انه في يوم الجمعة ساعة اجابة يعني ممكن واحنا بنسمع القصص ايمانا يزيد وندعي فيستجبها الله ، عشان كدة انا بدعو رجال الدين قبل نا تقوموا باي فتوى راجعوها من كل جوانبها ومتبصوش في جنب واحد ، وفي نفس الموضوع برده عيد الام قالوا بدعه انا عايز اسال سؤال هنا بقى اشمعنى عيد الام بدعه وعيد 6 اكتوبر مش بدعه وليه مش عيد الشهيد مش بدعه ( بالمناسبة حد يعرف عيد الشهيد امتى ؟ ولا بلاش فضايح ) طبعا الام احنا بنحتفل بيها طول السنة بس انا حاسس ان أي مناسبة تيجي في بعض رجال الدين بيحضروا اسلحتهم الكلامية قبل ما تيجي المناسبة والكلام بيتعاد كل سنة مفيش تغير . انا مش عارف امتى هنخلص من الكلام ده ؟ وبعد كده جه الموضوع اللي كل واحد فينا كان متضايق بسببه وهو المسجد الاقصى وانا فرحان معظم الناس قالت اخيرا ( لأ) بس في مشكلة بسيطة انا شفت مظاهرة كبيرة كانت ماشية وبعدين الظهر اذن والمظاهرة برده ماشية اكن المظاهرة اهم من الصلاة وانا اعتقد ان الصلاة اهم وده برده اكيد رايكم عشان الصلاة هي مفتاح تحرير الاقصى وفي نقطعة صغيرة نسيت اقولها المسجد اللي قبته لونها اصفر عارفينه تخيلوا ان ده مش المسجد الاقصى زي ما البعض فاكر والمسجد الاقصى هو اللي صورته على غلاف المجلة ) نيجي لاخر موضوع وهو الاعلام وموسم الكبار فقط والاعلانات الشبه ايباحية واعلانات الادوية الغربية اللي ظهرت فجأة يعني هو خلاص البلد بقى فيها عباقرة مرة واحدة والمواد الاعلامية الرديئة التي تذاع ومحدش يقولي انها فضائيات انتو اكيد عارفين ان في برامج اتلغت من بعض القنوات الفضائية يعني ممكن نلغي بعض المواد الاعلامية الرديئة بجد لازم الرقابة تعمل حاجة . في النهاية انا مش عارف لية كتبت في الموضوع ده بالذات يمكن عشان انا واحد فاضي ، ولا يمكن انا واحد نفسي ارجع قيمنا وسلوكنا ، ولا انا واحد عايز اتقدم بالبلد . بجد عايزين نفكر بره الصندوق شوية عشان نعرف نمشي يعني هو الصندوق هيسع 81مليون واحد ولو حصل كده يبقى اكيد حاجة من اتنين يا إما الصندوق بيكبر كل يوم ، و يا إما احنا بنصغر كل يوم .
