اتصلت بصديق بهدف التوسط لدى أحد أصدقائه صاحب معرض سيارات ليساعدني في تأجير سيارة لمدة شهر بسعر مخفض وبشروط بسيطة وبدون سائق... المهم مر بي، سلامات... سلامات، مجموعة من الأحاديث السطحية حول الأسرة والأبناء، وسبب تأجيري لسيارة، خلال 10 دقائق كانت المسافة بين بيتي والمعرض – تعرضت – لأكثر الأحاديث رتابة، وأخيرا وصلنا. : اتفضل يا هشام بيه ... اتفضل يا باشا نورت... الحاج نازل حالا - قالها شاب غريب الهيئة يبدو هاربا من حكم او سفرجي بقهوة بلدي عند موقف بولاق اسفل الكوبري الخشب - ونظر لي باستهانة أو بإهانة مرحبا .... اهلا يا باشا نورت : هو حج – أحدث هشام – : يا سيدي ما تدقش دخل رجل يمتد كرشه امامه يرتدي قميص بنص كم اسود حرير مرسوم بورد أبيض وبنطلون أسود غريب حبتين وفيه تنية من تحت أغرب منه وخاتم ذهب وظفر خنسره طويل وقذر من وجهة نظري والمصاغ الذهب بقى في الأيد والرقبة وحاجة تفرح واللطيف بقى ماسك سبحة تسعة وتسعين حباية... : أهلا يا هشام بيه... أهلا يا باشمهندس هشام : وحشني يا حاج ... –ودخل في الموضوع – الباشمهندس بقى أخويا وكان عايز عربية شهر كدة من غير سواق قلتله بقى الحاج عماد ده أخويا متحملش هم خالص الحاج : عنينا لهشام بيه وللباشمهندس – ناظرا بعين خبير- عايز عربية صغيرة ولا كبيرة يا باشمهندس؟ : يعني عربية متوسطة المهم تكون نضيفة وفيها تكييف بس ماليش طلبات خاصة الحاج : يعني تيوتا ولا لانسر تمشي معاك؟ وكله بما يرضي الله والله : زي الفل انا محتا..... يقاطعني جرس بإغنية سخيفة – الحاج يشير بخنسره ذو الظفر القذر بأن انتظر- الحاج : ألووو .... أهلا يا باشا أهلا أهلا.... والله مصر نورت الحاج : قاعد قد إيه يا باشا؟ ... ليه اسبوعين بس؟.... بسيطة يا باشا... الحاج : لا يا باشا أنا عندي ركوبة يا باشا ملوكي.... بشواتي والله يا باشا الحاج :لا يا باشا دي بيتي تقدر تقول كدة مرفوعة طول السنة.... أه والأسبوعين اللي بتتركبهم في السنة كلها إستعمال طبيب....... الحاج : هههه هههه .... لا يا باشا مش جراح يعني تقدر تقول كدة أنف وأذن الحاج : لا مش راشة يا باشا لا خوارج ولا دواخل .... دي خرج بيت والله يا باشا الحاج : بس انت تركب وتجرب والباقي مش هانختلف فيه المهم بس يا باشا تستريح الأسبوعين دول الحاج : يعني يا باشا مش هايبقى كتير 800 في اليوم بما يرضي الله كدة ... وطبعا يا باشا البنزين والزيت عليك، انا مش هاوصيك عليها الحاج : لا يا باشا مخالفات إيه دي فلة ملفها مافيهوش ولا مخالفة ولا وقوف ممنوع ولا كسر إشارة حتى الحاج : أمرك يا باشا 600 أمرك يا باشا بس بقى الصيانة عليك يا باشا الحاج : لا يا باشا بقولك ما بتتركبش اسبوعين على بعض في السنة استعمال دبلوماسي والله ...... حاضر يا باشا .. أمرك ... على الفندق حاضر يا باشا... بسلامة الله اتفضل يا باشا .. اتفضل... اتفضل... اتفضل. ميلت على هشام هامسا في أذنه : عربية إيه دي اللي ب 600 و 800 دي انضف عربية واقفة عنده برة تويوتا موديل السنة اللي فاتت. هشام هامسا في أذني : هو مين اللي جاب سيرة العربيات أصلا؟ ده بيرتب "سرير" الحاج : ها ياباشمهندس لامؤاخذا على العطلة تشرب إيه؟؟ لم أجيب كنت سارحا في الحوار التليفوني وأنا أبحلق في "الحاج" ولا أعرف كم من الوقت مضى وأنا صامت ولم أعرف كيف انتهت المقابلة... اليوم التالي فاتح جريدة رسمية ولفت نظري إعلان "لعظيم سيارة مرفوعة خمس سنوات الإيجار باليوم – بسائق وبدون" ولم أدرك أنني أتكلم بصوت مسموع : سائق؟؟ إزاي يعني؟؟ يعني العظيم هايتفرج بس؟؟؟ وانفجرت في الضحك. يوميات حمار من مصر