بعد أن أعلنت الراقصة المشهورة عن نيتها فى خوض انتخابات البرلمان.. أعتقد أن هناك أموراً كثيرة ستتغير على الخريطة السياسية والبرلمانية.. خاصة أن ربة الصون والعفاف لم تخبرنا إن كان ترشحها على المقاعد الفردية.. أم ستترشح على قائمة ونص.. ربما لإضفاء نوع من الغموض الساحر.. أو كنوع من الرقص على كل الحبال!! وقد سألنى أحدهم كيف سنصوت للراقصة الشهيرة.. فقلت له انتظر قليلاً.. فلو قدمت أوراقها رسمياً.. فسنصوت أنا.. وأنت على حال مصر!! فعاد مرة ثانية وسألنى الإخوان كانوا بيرشونا بالزيت والسكر.. يا ترى الست الشريفة العفيفة دى.. هترشنا بإيه؟! - قلت له عيب اختشى.. ابنك الصغير قاعد معانا!! فرد الولد الفلعوص.. يا عم فضفض.. واتكلم براحتك.. ما إحنا رجالة برضوا.. وياناس يا فل.. الخير للكل!! فخلعت شبشبى.. ففهم نيتى.. فجرى من أمامى.. وهو يضحك.. وينظر لى نظرات خبيثة!! ففوجئت بالأب يعاود سؤالى.. إلا.. قللى.. يا عصام أفندى.. اللى زى الحرمة الطلوقة دى برنامجها.. هيبقى إيه بالصلاة على النبى؟! فرددت عليه.. سيبك من سيدنا النبى.. لما تتكلم عن النوعية دى.. لكن فى اعتقادى الشخصى أن هذه الحرمة اللولبية.. ستكون أقرب ما تكون للشباب..وخاصة المراهقين منهم.. لأنها ستقدم لهم خدمات تعجز أي مرشحة محترمة للبرلمان عن تقديمها.. حتى إننى سمعت أنها ستقنن موضوع التحرش.. الذى انتشر مؤخراً! - فسألنى إزاى يعنى؟! فأجبت يعنى بدلاً من محاكمة المتحرشين.. هى هتحاكم اللى مش هيتحرش بالفتيات.. يعنى.. يعنى.. لو أى واحدة.. جرجرت سيادتك على القسم.. واتهمتك بالتجاهل.. وعدم التحرش بيها.. هتروح فى دوكة!! سألنى.. معقولة دى؟! - قلت له بل إننى سمعت أنها ستغير النشيد الوطنى حتى يناسب المرحلة الراهنة.. وتخليه على النغمة الشهيرة.. هاتى بوسة يا بت!! واستكمالاً لخطتها فى تدليل الشعب.. وفرفشته.. فقد أعلنت أن إعادة فتح بيوت الدعارة التى أغلقت فى الأربعينيات من هذا القرن.. على رأس أولوياتها..وأول «نمرة» فى برنامجها الانتخابى.. تطبيقاً لمبادئ الحرية.. كما تفهمها جنابها!! - كما ستضع خطة للحد من المساجد والكنائس فى مصر.. على أن يتم التوسع فى مدارس الرقص الشرقى.. كما أعلنت أنها ستوزع بدل رقص مجانية على طالبات المدارس والجامعات.. بدلاً من المرايل.. حتى يتعلموا حاجة تنفعهم فى المستقبل.. بدل تعب العلم والعلام!! أما الطلاب وتلاميذ المدارس فستوزع عليهم «صاجات».. لزوم الشغل!! - كما ستلغى عمل المأذونين الشرعيين.. لزوم التسهيل وفك العقد.. وتجعل كل بنت يعترف لها شاب بحبه.. طالما قالت له: وأنا كمان.. يبقى ده جواز ونص..مش الجواز رضا.. وقبول.. يبقى إيه لازمة التعقيد.. وبعد ما يخلفوا.. يبقى يقرروا مصير علاقتهم!! فسألنى.. وده على شرع مين بقى؟! - قلت له.. ده على سنة وشرع أخونا مارادونا.. بتاع الكورة.. اللى دخل على مراته.. وبعد عشر سنوات.. أنجبا فيهم البنين والبنات.. قال لأولاده.. يللا البسوا هدومكم.. وتعالوا نخرج. ولما سألوه.. هنروح على فين إجابهم.. أنا رايح أتجوز ماما!! فعاد لسؤالى مرة أخرى.. ودى لما يخاطبها رئيس المجلس.. هيقول لها برضه..سيادة النائبة المحترمة!! - قلت له طبعاً لأ.. هو هيقول لها اتفضلى يا شابة.. ولو رفضت تتكلم يقولها.. بشوقك يا ابلتى!! - قالى طيب والتصويت بقى هيبقى برفع الإيد.. ولا بحاجة تانية؟! - قلت التصويت بإذن الله.. هيبقى بهز الوسط.. فإذا رقصت وسطها.. فإن ذلك يعنى موافقة.. وإذا أعطت ظهرها لرئيس المجلس.. وقالت له.. سم يا كبه.. معناها رفض القانون.. أما إذا لعبت حواجبها.. فدى يعنى امتناعها عن التصويت!! سألنى.. طيب والجلسات هتبقى ليلية ولا نهارية؟! - قلت.. نهارية طبعاً.. الليل دى ده شغلها اللى بتاكل منه بغاشه وبقلاوة كمان..وربنا ما يجعلنا من قطاعين الأرزاق!! وأنهيت حديثى له قائلاً.. كفاية بقى.. سم كده!!
