نشطاء للمنتخب: ملكوش فى الرياضة ادخلوا أدبى

عقب هزيمة المنتخب المصرى أمس أمام نظيره التونسى بهدف مقابل لا شىء في استاد الدفاع الجوى فى إطار منافسات الجولة الثانية من تصفيات أمم إفريقيا 2015 اشتعلت التعليقات الساخرة على مواقع التواصل الاجتماعي "فيس بوك وتويتر".
حيث انتقد "بودى" مستوى أداء المنتخب، مضيفا "طالما مصر ملهاش في الرياضة ما تدخل أدبي أحسن، منتخب مصر يتبرع بكل نقاطه في التصفيات لصندوق تحيا مصر".
وسخر "محمد أحمد" قائلا: "يا جماعة مش معنا أننا خسرنا ماتشين يبقى خلاص بالعكس دى تدينا الدفعة إننا نخسر التالت والرابع إيه المشكلة، هيا غلطة شوقي غريب منزل أوكا في الدفاع من غير أورتيجا، فين أيامك يا حسن شحاتة".
وأشار ناشط أخر إلى أن هناك من سيظهر يطالب بالتبرع للمنتخب حتى يصعد، مضيفا: "ما هى ظاطط بقى انا مش مش عايز انا مش قادر".
وأشاد "إبراهيم قاسم" بالمستوى الأخلاقى للاعبين لدرجة أنهم مش عاوزين يجيبوا جول في الضيوف اللي جايلنا من آخر الدنيا، مضيفا "منتخب مصر فى التصفيات زيرو أهداف، زيرو نقاط، زيرو لعيبة، زيرو اداء زيرو عشرة أربع وحايد صفرين اتنين".
وقال "أمجد احمد" مصر شالت فوق طاقتها يرضى مين فين باكاتها وخطوط هجومها المخلصين بتتغلب وخلاص بقت من المنفوخين، كما قال "انا بقول نروح أحسن أصل حتى لو طلعنا ولعبنا فى كاس الأمم الإفريقية هيتعلم علينا وهيجى علينا ماتش زى بتاع ألمانيا والبرازيل".
وأعرب انس عبدالله عن استيائه، قائلا "انتوا ليه مش قادرين تستوعبوا دماغ المنتخب إحنا ابهرنا العالم إننا خدنا كاس إفريقيا 3 سنين ورا بعض وبعون الله هنبهر العالم إننا مندخلش كاس إفريقيا 3 سنين ورا بعض دي خطة محكمة ايش فهمكم انتوا ماتخلوش اللي بيحصل فينا في أمم إفريقيا ده ينسيكوا جون مجدي عبد الغني في كاس العالم".