شنت سلمى صباحي، نجلة المرشح الرئاسى حمدين صباحي، هجوماً حاداً على المرشح المنافس عبدالفتاح السيسي، وتساءلت عن رفضه قبول المناظرة مع والدها هل ضعف أم خوف. وقالت على صفحتها على "فيس بوك": "لكل صحابي مؤيدين السيسي عندي كام سؤال مش عارفه إجاباتهم أتمنى تفيدوني: "إنتوا شايفين اللي السيسي عمله في 3 يوليو جميل في الشعب المصري، ولا واجب عليه كرجل عسكري وطني؟". وأضافت: "في الانتخابات الرئاسية.. إزاي معندكوش مانع تنتخبوا مرشح معندوش برنامج انتخابي؟ طب هتحاسبوه على إيه؟!.. واستطردت "أنا عارفة إن أغلبكوا ممكن يكون مش مع ثورة يناير أصلا، لكن هذه كانت ثورة شعب وراح فيها شهداء واتصاب فيها كتير"، "تفسروا بإيه إن تقريبا كل رموز الفساد في النظام القديم اللي قامت ضدهم الثورة دي وعلى رأسهم مبارك نفسه مؤيدين للسيسي؟." وتابعت صباحى: : "في الانتخابات الرئاسية في العالم كله لما يكون في اتنين مرشحين للرئاسة لازم تتعمل بينهم مناظرة علنية على الهوا قدام الشعب كله، ومش من حق المرشحين الاعتراض أساسا لأن ده حق للشعب.. تفسروا بإيه رفض حملة السيسي للمناظرة! هل ده ضعف ولا خوف من قوة المرشح المنافس!" واستطردت :"الرئيس هيكون عايش معانا "ع الهوا" مش هيقود البلد "بالمونتاج" .. تفسروا بإيه عدم ظهور السيسي ع الهوا ولا مرة وليه كل لقاءاته ممنتجة؟! وتفسروا بإيه عدم نزوله في مؤتمرات شعبية وسط الناس مع أن ده تقليد أساسي في أي حمله انتخابية في العالم ؟ مش يمكن ده يتفسر إنه "تعالى" على الناس أو عدم ثقة في النفس؟". واختتمت نجلة المرشح الرئاسى: "دي أسئلة كتبتها بمنتهى الاحترام ليكم ولمرشحكم لإني مؤمنة إن المنافسة لازم تكون شريفة ونضيفة وعايزة أعرف إجاباتها منكم بمنتهى الذوق.. يا ريت تجاوبوا بجدية في التعليقات وأشكركم على سعة صدركم وخليكوا فاكرين الرئيس بيروح وييجي والشعب باقي..إحنا اللي باقيين لبعض."