يستحق موقع "فيس بوك" ان يكون "نجم" انتخابات مجلس الشعب، بعد أن شهد على مدار ساعات يوم الأحد (موعد التصويت) نشاطًا كبيرًا من جانب أعضائه، الذين تسابقوا في كتابة "تعليقات" ذات علاقة بالانتخابات وتمثل رؤية كل منهم لها، أو تحميل لقطات الفيديو التي ترصد بعض الانتهاكات في اللجان الانتخابية التي قام أعضاء الموقع بتصويرها بأنفسهم عن طريق التليفونات المحمولة أو من خلال رفع لقطات أخرى على صفحاتهم من موقع Youtube. كما شهد الموقع قبل الانتخابات قيام الكثير من المرشحين بإنشاء صفحات خاصة لهم كنوع من الدعاية لأنفسهم وجذب الشباب، إلى جانب إنشاء العديد من المجموعات "الجروبات" التي تحاول مراقبة الانتخابات ورصد ما يدور بها. التعليقات هي الحل بمتابعة "تعليقات" أعضاء الفيس بوك خلال يوم الانتخابات يمكن ملاحظة تنوعها بين السخرية، ورصد سير العملية الانتخابية، والحزن على حال مصر، وانتقاد الحزب الوطني. وإليكم بعض من هذه التعليقات: - التزوير هو الحل - وفي قول آخر: التزوير سيد الأخلاق (أو سيد الحلاق - مش هتفرق كتير) - الحبر الفوسفوري راح من صباعي قبل مرور 4 ساعات... يعني الصباع يصوتله تلت أربع مرات ف اليوم - ويسألونك عن الانتخابات والحزب الوطني، قل فيهما اثم كبير - أخيرًا أنا "صوت" أخيرًا أنا دلوقت.. هاعلي "صوتي" عليك - الجلوس في المنزل أو الذهاب إلى العمل أعلى درجات "الوعي السياسي" - في منافسة شديدة بين الوطني والوطني علي الفوز بالمقاعد البرلمانية، فاز الوطني علي الوطني في معظم الدوائر، فيما يعيد الوطني مع الوطني في جولة الإعادة علي عدد من الدوائر. - تطلعت يا سعادة الرئيس.. أهي نزيهة آخر حاجة! - أنا هنام وخايف بس مش عارف خايف من اية ؟؟؟؟ يارب عديها علي خير .... تصبحوا علي خير - عايزة أروح ابطل صوتى .. ممكن حد يقولى ازاى ؟؟؟ - الصوت كان ف لجنة المدرسة اللي قدام بيتي ب 50 جنيهاً في مساكن الفسطاط والناس كانت بتتخانق في الشارع ع الفلوس وجنب الشغل ب100 الجمالية وعلي عينك يا تاجر. - اللي يشوف تامر أمين والمحترم عبدالله كمال في مصر النهاردة يصدق إن مصر بخير وزي الفل والانتخابات كله تمام زي ما بيقول التقرير، وكل "الناس التانيين" وحشين وولاد ستين في سبعين. - حجب مواقع الاخوان، رشاوي وصلت ل 250 جنيهاً للصوت، بلطجة، تسويد بطاقات، تزوير داخل اللجان، الجرائد القومية تقول "عرس الديمقراطية"، ده "عرس" عتريس على فؤادة .. بس للاسف مش لاقي الناس اللي تقول باااااااااااااطل. - الانتهاكات اللى حصلت لغاية دلوقتى تكفى لتزوير 1000 انتخابات...لا حول و لا قوة الا بالله! - هاهاهاها .. الداخلية بتقول الانتخابات كانت في جو ديموقراطي... ده مات 9 لحد دلوقتي! والله بجد جامدين جدا.. - رئيس اللجنة : الحبر السري الناخب : ياعم ياعني لازم أوسخ أيدي ...كبر دماغك أنا مش هنتخب أصلا تاني ..أنا جاي أهزر رئيس اللجنة: علي رأيك هو في حد بينتخب أصلا ..سلام عليكو.
