شارك الشاعر سيد حجاب أمس في أمسية شعرية غنائية نظمتها دار الأوبرا ضمن فعاليات الأسبوع الثقافي الفني المصاحب لمعرض"سجل يا زمان .. ثورة مصر". حيث قدم خلال الأمسية عددا من القصائد الشعرية عن ثورة 25 يناير كان من أبرزها قصيدة مووايل من قلب الميدان؛ كما شاركت في الأمسية الفنانة عزة بلبع وتغنت بعدد من الأغاني الوطنية . وشهدت الأمسية حضورا كثيفا من قبل الحضور حيث طالبوا حجاب بإعادة إلقاء قصائده كذلك تفاعل الحضور مع أغاني عزة بلبع التي كانت قد تغنت بها من قبل في ميدان التحرير أثناء مشاركتها في الثورة. "مواويل فى قلب الميدان" والله زمان ..يا زمان العزة والله زمان وادى عيد قيامة بلدنا اتقام فى قلب الميدان زهرة شبابها العدالى ...رجّعوا لها شبابها بالدم حَنّوا ترابها .. وهدوا عرش الجبان *** يا كامب ديفيد يا أول عهد الاستسلام كام وأربعين عام عار.. باسم السلام وكان شالومهم خيانة وشوم وذل وفساد ومهانة واستبداد..وظلم وضلام *** دى ثورة شعبية يا ولاد ولاّ ده مهرجان قلعنا وش الكآبة.. الفرحة مالية المكان مينا يوضِّى أمينة.. وبنيامين خَد حسين وقاموا قداس وصلّوا سوا...وعلُّوا الأدان *** الله أكبر..يا كلمة زمان قالوها الجدود الله هو الحق.. والحرية هيه الوجود والكل فى واحد..احنا..كلنا واحد ودى عبقرية مصر..وده سر الوُجود والخلود يا أمة قومى.. وقيمى دولة مدنية الكل إخوة ف وطن.. والكل سواسية ساعد فى ساعد..وحلم الكل فى واحد أخوّة.. حرية..وعدالة اجتماعية *** واصحى يا جيش الوطن ..يا شعب ما تنامشى لازم فلول النظام ورموزه دى تمشى كل اللى حاول كتير تغيير عقيدة الجيش وكل مين خان وباع ناسنا.. مايحكمشى *** والقصة مش أقنعة تلبس ده.. تقلع ده...! دى عروش وطواغيت بتهوى والشعوب صاعدة ونظام هوى رأسه .. باقى نِحِشُّه من ساسُه ودى ثورة شعبية.. واحنا وجيشنا إيد واحدة *** يا فلول نظام العمالة والفساد والذل ما تطلعوش م البيبان وتخُشوا م الشبابيك ولا بد نحاسبكو.. وده رأيى ورأى الكل والشعب لما أمر ..قال القدر: شبيك *** وإياكو يوم تؤمروا الجيش يضرب الناس دول تبقوا انتحرتوا بغباوة.. والحساب ح يطول زينة شباب مصر..أصفى قلوب..وأضوا عقول على ميعاد ويا ميلاد فجرنا المعدول *** الجيش ده جيش الوطن.. مش جيشكو يا باشوات ده جيشنا..حتى إن والاكم بعض كباراته جيشنا احنا: شعب ووطن مش جيش نظام أغوات وموقفه حتمى ويا حبايبه..وأخواته *** وأغبى حاجة اللى فاكرين ناسنا بريالة ح يسكّتونا ببزازة اسمها: لجنة ! اللجنة على راسنا لكن ناسنا رجالة ولا أى دستور ح يمشى إلا بمزاجنا *** شرعية ايه اللى بتناقشوها يا أساتذة دساتيركو داسوها والناس مصدر السلطات دساتيركو واقعة سوا التفصيل أو الجاهزة شرعية الثورة شعب وقام .. على نظام مات *** وأمانة ياجيش وطنّا: اللى يطَمِّنا مجلس رياسة يكون مدنى..ودى مش مِنَّة الشعب رب الدار.. وصاحب القرار وحكومَه كفاءات تكون منا.. تأمِّنّا *** وشبابنا ده اللى ما زال مرمى ورا القضبان يطلع بعزة وكرامة.. ونسجن السجّان ونهد أُس الفساد وحُكم الاستبداد وكل مين خان بلدنا وبالعدو استعان *** والمليارات اللى سبعين.. واللى ما اعرف كام إشى عُمُولات واشى عَمالة لإسرائيل ده مالنا إحنا..حلالنا احنا.. وعليكو حرام وح يستردوه شباب الجيل..ولاد النيل *** أما اللى بيقسِّموها وهيه لسه عجين مستعجلين ليه؟ .. شوية وتستوى التورتة! دولتنا جاية وكلنا إخوة متساويين والشعب صاحب البلد دى ومصدر السُلطة ***