يواصل مجلس برلمان المصطبة جلساته الطارئة لمتابعة الاحداث المصيرية للوطن. شيخ المجلس: حضرات الاخوة نواصل اجتماعاتنا لمتابعة ومناقشة الاحداث الجارية لتشكيل مجتمعنا الجديد وأن نكون مفتحين عيوننا لمراقبة ما يجري ونعلن رأينا في مصير بلدنا. العضو الفلفوس: والله يا جماعة أنا شايف ان الامور استقرت بعد انتخاب رئيس للجمهورية وده شيء مهم خالص إن البلد يبقي فيها كبير وده احنا انتخبناه يبقي لازم ولابد أن نقف جنيه إن أحسن كان بها وان أخطأ قومناه بالحجة وكفاية شوشرة. العضو زعيط: احنا كنا الاول ولا مؤاخذة يعني زي التيران وناكل ونشرب ونقعد قدام المدعو التليفزيون اللي خرب عقولنا واللي كان يقول حاجة بصوت عالي تاني يوم تلاقيه تحت الارض في المدعوقة اللي اسمها أمن الدولة وياما ناس راحت فيها ولا رجعتش تاني وربنا ألهم الشعب وقامت ثورة والامور استقرت وكفاية خطب ومواعظ وخلينا نلتفت لمصالحنا. العضو النمرود: والله يا جماعة كلام الجدع زعيط في العضم وكأنه فلفوس وكفاية تصريحات وتظاهرات وجماعة القنوات الفضائية يبطلوا ندوات ومناقشات واحنا خلاص ويفكروا في حاجات عملية توكل الناس عيش وتعالجهم. العضو معيط: والله يا جماعة الشعب كله دلوقتي بيفهم في القانون والدستور اللي بيقولوا عليه يعني كده بالصلاة علي النبي بقينا نفطر دستور ونتغدي دستور ونتعشي كمان دستور والله يوقف حال الدستور وسنينه عاوزين مشاريع ومعاها حرية يا ظلمة وبقينا نفهم أكثر منكم وكفاية عليكم منظرة وخلاص عرفنا حقوقنا عاوزين بقي نعرف واجباتنا علشان البلد تقف علي رجليها وما تشحتش من حد. العضو نطاط الحيط: يا جماعة الخير انتم مش واخدين بالكم من اللي بيحصل دول جماعة مش عاوزين النظام يستمر وعاوزين يهدوا البلد ونازلين مواعظ كأن مفيش حد بيفهم زيهم يعني أنا عاوز واحد يطلع ويقول كام واحد اتكلم في الدستور وكام واحد اتكلم في تشكيل البرلمان وكام واحد اتكلم في الهوا ما فيش واحد اتكلم ازاي نوكل الغلبان رغيف عيش يليق ببني آدم وكام اتكلم في علاج الغلابة وكام واحد اتكلم في سكان الجبانات والعشش مع الفيران والتعابين والقمل والبراغيت وفي النهاية فيه ناس واضح خالص انها مش عاوزة الثورة لان مصالحهم في السكة للزوال وكلنا عارفينهم وإن شاء الله ربنا معانا. شيخ المجلس: كفاية كدة علينا الجلسة دي والسلام عليكم.
