بقلم:عثمان أبوزيد منذ 6 ساعة 58 دقيقة استأنف مجلس برلمان المصطبة جلساته الأسبوعية بعد إجازة عيد الفطر أعاده الله علي مصر وشعبها وهي في أحسن حال واستقرار. شيخ المجلس: حضرات الإخوة في جميع الأنحاء في الجمهورية يتوجه إليكم أعضاء مجلس المصطبة بالتهنئة بعيد الفطر ونسأل الله أن يعيد علي شعب مصر بجميع فئاته وطوائفه وهم في أحسن حال ولنبدأ الجلسة وعنوانها خواطر عن الأحوال في جميع البلاد. العضو الفلفوس: يا إخواني الأعزاء طبعاً كلنا شفنا وسمعنا وقعدنا مع أهلنا من الإسكندرية لغاية أسوان وسمعنا كلام كتير والخلاصة إن كل واحد عاوز يبقي عنتر زمانه سواء كان مؤيداً أو معارضاً وده في النهاية لا يودي ولا يجيب. العضو النمرود: أنا اللي فارسني ومعايا ناس كتير مفلوقة إن كل واحد فاكر نفسه هو الأوحد العياذ بالله اللي فاهم البلد عاوزه إيه ومفيش حد عاجبه كلام التاني وبقينا خلاص فلاسفة ومفكرين مفيش زينا يعني كده الحكاية بقت خلاص سمك لبن تمر هندي. العضو نطاط الحيط: ياجماعة أنتم مش واخدين بالكم من حاحة مهمة خالص وهي إن فيه ناس مش لاقية لنفسها مساحة في الشهرة فيقوموا يقولوا إحنا أولاد المأسوف عليه المخلوع وده طبعاً لا حايودي ولا يجيب لكن فرقعة في الهوا وخلاص وتطلع صورته في الجرانين والتليفزيون ومش قادر يعرف إن الأمر انتهي ولا مجال للعودة للوراء. العضو زعيط: أنتم ناسيين حاجة تانية كمان وهي إن قنوات التليفزيون في معظمها مش بريئة وفاكرة إن الناس مش فاهمة اللي بتعمله القنوات المضروبة وعلي كل حال قضي الأمر وبعدين فيه حساب أمام التاريخ. العضو معيط: ياجماعة أنا عاوز أقول كلمة وهي إن الناس اللي طالعة تقول كلام ونصايح وطلبات لازم تبطل وننتظر مجلس الشعب اللي جاي وساعتها يتم الحساب لكن الحساب دلوقتي غلط وغير ممكن وكفاية منظرة. شيخ المجلس: ترفع الجلسة ونكمل الاجتماع الجاي. الفلاح الفصيح عثمان أبوزيد
