جيت الدنيا مشفتش بابا.. وعايزك بابا لمدة يوم اصل بابايا مات في مظاهرة.. وجدي توفي في نفس اليوم وعايز حد عاقل اشكي له.. يعرف ابنك ليه مهموم شارع الثورة اتملي غربان.. وظهرت فيه احزاب كالبوم ارجو يا بابا قبل ما تمشي تعرف ابنك لي مأزوم مأزوم طبعاً م الهمجية وعدوان وطني ملهش لزوم مصر بتغرق في الميادين.. وشبح الفقر جمان بيزوم وصاحب ثورة اتخطفت منه.. وماشي في مظاهرة دماغه مخروم..!! مصاب بجفاف وتشرد وطني.. وم الهتافات صوته مكتوم محدش سامعه حابس دمعه.. صاحب حق خدوه متهوم..!! والقناصة رموه برصاصة وخبوا الجثة في البدروم..!! بابا نويل يرضيك يعني حقي يبقي كمان مهضوم وأنا مصري صاحب ثورة.. أموت بالغاز والطوب والشوم مصر عظيمة وأم كريمة.. ليه من خيرها أعيش محروم بأيد اولادها حرقنا تاريخها.. عرفت ابنك ليه مهموم..!! شوف لي حل قوام ياسي بابا.. أنا همومي صبحت كوم وماشي في حالي وبيتهيألي ان وجودي ملهش لزوم..!! وان الوطن العربي خرابة كل شارع فيه ملغوم انا مش عارف ايه راح يجري.. أنا خلاص مبشفش النوم شوف لي الطالع قبل ما تمشي.. بابا نويل ابنك مغموم غرب وشرق رعد وبرق.. إمتي جيوش الحق تقوم ذري نووي صواريخ عابرة.. عالم كله ضباب وغيوم..!! أنا مش عايز أي هدايا عايز شحنة حب يدوم عايز كلمة حق صريحة متخليش ولا بيت مهدوم..!! ولا حاكم ياكل حقي.. ويخطف رزقي من البلعوم أنا جريح في مهب الريح.. م الاحباط مش قادر أقوم أنا بتمني أعيش في سلام.. ولا أشوف ظالم ولا مظلوم إعمل حاجة الناس محتاجة.. كلمة حق تهدي القوم بابا نويل أقولك حاجة.. انقذ ابنك المأزوم وقبل ما تمشي خدني معاك.. لعالم تاني يكون مفهوم..!!