الشعب يريد اسقاط النظام الشعب يريد اسقاط الحكومه الشعب يريد اسقاط ال..مصر الشعب يريد انقاذ ال..مصر ده كان هتاف ابني عمر النهارده ... وبالترتيب التنازلي ... في هوجة هتافيه ثوريه اعتيادية من وقت قيام الثورة ... اثناء الثورة .. الهتاف ماكانش بينقطع من البيت ..وولادي يبدؤا من هنا والعدوى تنتشر للجيران ... والاقي جارتي بتخبط عليا وتقولي ... حرام عليك يا شيخه .. عيالك كل ما يهيجوا ويهتفوا .. عيالي يهيجوا وراهم .. والهتاف يبتدي ولا كاننا قاعدين في ميدان التحرير ... وكنت باقولها .. لو مش قادرين ننزل التحرير بعيالنا .. اقله نجيبه لهم هنا .. ويحسوه ويعيشوه ويشربوه .. في عقولهم ووجدانهم ويتحفر في ذاكرتهم .. احنا عايشين وقت واحداث وتاريخ جديد بينكتب لينا وليهم ولمصر ... ونادر ده يتكرر .. على الاقل في حياتنا ... ويمكن حياتهم كمان ... وكان ولادي كل مايشوفوا حد فينا نازل يخرج .. خصوصا اختي اللي كل يوم من طلعة الصبح تضرب الكوتشي في رجليها وتلفح العلم في ايديها والموبايل اللي غالبا ماكانش لاقط شبكه في التحرير تخبيه في جيبها.. كانوا كل مره يسالوا السؤال المعتاد المتكرر بدون ملل او زهق ... هو انتي رايحه فين يا مامي ؟؟ انتي رايحه عند مصر ؟؟ طب خدينا معاكي عايزين نروح مصر معاكي .. وكانت الاجابة .. يا حبيبي ما احنا في مصر ..يردو يقولوا ..لا عايزين نروح مصر اللي فيها الاشرار اللي بيضربوا المصريين الطيبين ...عشان نحارب الاشرار دول ... (ولادي كانوا مقسمين الناس اما مصريين طيبين بيحاربوا عشان مصر او اشرار مش مصريين وبيضربوا المصريين وعايزين يقتلوهم... والتقسيم ده كان تلقائي من نفسهم بدون اي ايحاء او توجيه ..من كتراللي كانوا بيشوفوه ويسمعوه ..وخصوصا اللجان الشعبية .. وسهر الليالي في البلكونات .. وادوار الشاي والقهوة والنسكافيه اللي نازلة كل شوية من البيوت ... ولمة الجيران الجميلة الدافية .. اللي كانت بتخفف برد وخوف ورهبة.. انتظار وترقب .. محاولات البلطجية للهجوم علينا .. خصوصا وقت صلاة الفجر .. لاستغلال انشغال الناس في الصلاة..) والنهارده .. جاتلهم كالعاده هوجة هتاف ثوري .. بتيجي وحدها .. بس ما بتروحش وحدها ابدا ..ولازم يكون لها اثار وتوابع ..المهم .. في وسط الهوجه والهتاف .. لقيت عمر ابني بيقول .. الشعب يريد اسقاط ال..مصر .. سالته .. ليه يا عمورة عايز مصر تسقط ؟؟ مش مصر دي حبيبتك اللي عايز تدافع عنها بردو ؟؟ .. راح قايلي ... سوري اتلخبطت ... خلاص هاقولها .. الشعب يريد انقاذ ال..مصر .. سالته .. انقاذ مصر من ايه ؟؟ قالي .. مش انا خليتها تسقط .. خلاص .. انا بقى هانقذها .. الشعب يريد انقاذ ال..مصر ... الشعب يريد انقاذ ال..مصر ... طول اليوم وانا باتفرج واقرا واسمع .. اللي خلى نفسي تغم عليا .. وقلبي يوجعني .. وعقلي يشت .. من اللي بيحصل في مصر ولمصر .. واللي اي واحد باقل درجات العقل .. هايفهم فورا .. مين ورا اللي بيحصل ده .. والمستفيد الاكبر والاعظم منه ... كان هتاف عمر ابني حاضر جدا قدامي وفي تفكيري .. الشعب يريد اسقاط النظام ... هل سقط النظام فعلا وكلية ؟؟؟؟ الشعب يريد اسقاط الحكومة ...مطلب .. هل مازال قائم ؟؟؟ الشعب يريد اسقاط ال....مصر ....الخوف والرعب والدمار فعلا ... ان الشعب .. بغفلته واندفاعه وهياجه اللاواعي واللاعقلاني ... هو اللي يسقط مصر .. الشعب يريد انقاذ ال... مصر ....امنية وتضرع ورجاء ودعاء لله ...ان شعب مصر يفوق ... وينقذ مصر .... اللهم احمي مصر من المصريين ... اللهم احمي مصر من انفسنا ... وشرور انفسنا ... وشرور اعمالنا ....... اللهم امين ... بحبك قوي يا مصر .....