بقلم:سيد حامد [email protected]* إلي كل عناصر لعبة كرة القدم في مصر.. لماذا لا تنهال السكاكين.. والاعتراضات.. والتهديدات.. ومافيش مانع الشتيمة والألفاظ غير المحترمة والاحتجاجات إلا في مصر عقب تعادل.. أو حتي فوز.. ناهيك عن الهزيمة للأهلي.. والزمالك.. بصراحة شكلنا بقي وحش قوي وشكلنا كده يا الأهلي يفوز علي طول شرعي وغير شرعي.. وشرحه الزمالك. وأقول لكل السادة المحللين.. والمقدمين.. والمؤرخين لمسيرة الكرة في مصر ارحموا من يتابعكم لأن حقيقي الموضوع بقي غير محتمل.. والمصيبة ان الكل بيعمل كده فاكر انه بيكسب ود جمهور الأهلي.. أو الزمالك وأقول لهؤلاء.. إذا لم تحكموا ضمائركم قبل الهواء.. فلا تخرجوا علي الناس بآرائكم التي تشعل النار والتي تطال الحكام.. واللاعبين.. وادارات الأندية وكذا الأجهزة الفنية. بالذمة انتوا بتشاهدوا الدوريات الأوروبية والمحللين اللي حق والأناقة والشياكة في الكلام والحوار والأدب واللباقة وفوق كل ده في ربع ساعة إذا لم تصل لنصف عقب المباراة مش عندنا.. فرشنا الشاشة وهات يا تقطيع في اللعبة دي واللمسة دي والزقة دي والهرشة دي وشوف والنبي اللاعب ده بيبص ازاي ولا ده مكشر.. وإيه علي مدي ثلاث وأربع ساعات لحد ما الواحد يقربف ويقفل التليفزيون وينام.. اتمني من الجميع بلا استثناء يدخلوا دورة مشاهدة لليورو سبورت ويعرفوا أصول التحليل والتعليق والتقديم.. مش كله يتحلل علشان لزوم الاعلانات والملايين اللي بيقفشها فقط اطلب من الجميع أصدقاء وزملاء قلم حكموا ضمائركم.. نحن الآن احوج ما نكون الي عودة الضمير.. حتي يرتاح البال.. وينام الإنسان وهو يقول الحمد لله الذي هدانا وما كنا لنهتدي لولا أن هدانا الله. * ألف مبروك لكل زملاء الدرب في ماسبيرو بعد ان وصلهم قطار الترقيات عصام الأمير وعصام العراقي ومصطفي محمود وممدوح يوسف ومني هلال وهالة أبو علم وعبد الفتاح حسن.. والله يوفقكم لما فيه خير مصر. وشكراً للوزير العزيز أحمد أنيس.
