* نصيحة لرئيس نادي الزمالك ممدوح عباس.. ارجو منه أن يكف عن دلع النجوم.. والطبطبة عليهم أحسن الواحد منهم أصبح مش طايق نفسه. ولو صح ما نشر عن شراء ممدوح عباس لفريق الزمالك وتحويله إلي شركة.. ياريت تسمع نصيحتي.. بلاش انت مش ناقص.. لأن لو حصل الفريق ما ح يجيب غير وجع القلب وح يبقي بخسارة عليك يا كينج. * الناس ومسئولو الاتحادات اللي نازلين تقطيع في حسن صقر أقول لهم عودوا إلي أيامكم الأولي مع صقر ح تلاقوا إنه السبب في مناصبكم اللي البعض منكم لا يستحقها وعمل بلاوي كتير ولما صقر اكتشف بقي وحش.. دلوقت بقي وحش معلش يازمن. * لو صح أن عمرو زكي يطلب فسخ عقده مع الزمالك أقول له ولكل اللاعبين ممن يهددون ويلوحون بذلك.. افتح الباب أمامهم فمن لا يرغب في ناديه.. مع ألف سلامة والقلب داعيله بس خسارة الملايين اللي أخذها ولم يفعل بها!.. حاسبوه علي كل دقيقة لمس الكرة فيها بميت جنيه.. وياريت إدارات الأندية تنسي حكاية الإعفاء من الضرائب.. ليه.. هما علي راسهم ريشة.. مش كفايه اللي بيلهفوه.. صحيح اللي تحسبه لعيب.. يطلع.. يا خسارة.. بلا شيء تلعب علي نغمة الجمهور. * اللي مشافش مباراة ريال مدريد والنادي الملكي وهو مهزوم 2/صفر من ملقا في كأس إسبانيا فاته نصف عمره.. في 7 دقائق أصبح الريال فائزا.. ياريت لاعبو الزمالك يتعلموا.. وكمان يندموا علي الأداء الوحش في مبارياتهم الأخيرة في الدوري وقبل ما يتكلموا علي فلوسهم يعترفوا بمستواهم.. مش كده ولا إيه.. يا عيني علي الجمهور. * بمناسبة لقاء الأهلي والبايرن.. من قال إن نتائج الأهلي الأفضل في تاريخ العرب والقارة السمراء أمام الأجانب.. أمال الزمالك فين.. يا ناس اتكسفوا وقولوا الحق.. يا سبحان الله.. التاريخ لا يمحي.. مش كفاية الحكاية إياها.. طيب ح اذكر النتائج بكره وعاوز اشوف بقي مين الأفضل.. ومع ذلك أقول إن نتائج الأهلي مشرفة..