فلان : تقدر توصف لي أحوالنا إيه دلوقت وكل واحد فينا له رأي مختلف.. وهو بس اللي الصح.. والباقي غلط. علان : أولا الاختلاف سنة الحياة.. ثم إيه المانع أنا احب ابني.. يبقي له شخصية مستقلة وما يكونش نسخة فوتو كوبي مني. فلان : بس في الأول والآخر.. لازم نتفق علي الأهداف الكبيرة. علان : مرة شفت لقاء بين شيخ سلفي وشاب ليبرالي.. لما اتكملوا في الدين اختلفوا ولما اتكلموا في السياسة والاقتصاد والتجارة اتفقوا جدا. فلان : لأ عندك فيه فرق بين الاختلاف في اسلوب التدين.. والخلاف في الدين نفسه. علان : الله ينور عليك انك بتتكلم صح. فلان : وصح الصح اننا نعرف أن مصلحة البلد زي المشوار اللي كلنا متفقين عليه يعني كله رايح اسكندرية.. فيه اللي راكب قطر أو طياره واللي رايح بعربيته واللي بالتاكسي أو الميكروباص أو اللي مسافر علي حصان أو واخدها مشي.. المهم نوصل لنفس الهدف. علان : تشبيه بليغ بس نسيت واحد؟ فلان : مين هو علان : اللي مصمم يمشي لغاية اسكندرية علي ايديه! ابن البلد