علقت ليلى سويف، والدة الناشط السياسي علاء عبدالفتاح وسناء سيف، إحدى المحتجزات في قضية الاتحادية، على ما تم تداوله من أنباء حول الإفراج عن المحبوسين في قضية الاتحادية والمحكوم عليهم بالسجن سنتين لحين الفصل في الطعن على الحكم. وقالت "سويف" في تدوينة على صفحتها الشخصية عبر موقع التواصل الاجتماعي "فيس بوك" "إنتم مستعجلين على خروج الشباب ليه؟ الشباب اللي بره السجون كل يوم بيتقتل منهم، اللي في تفجير واللي برصاص البوليس واللي من التعذيب واللي من الحوادث، على الأقل اللي في السجن إحنا عارفين مكانهم وعارفين نشوفهم ونطمن". وأضافت سويف: "شفت إزاي الناس إمبارح كتير منها صدق إن الشباب خارجين وطبعًا مدى الألم اللي حسوا بيه لما ده ما تحققش.. هأقول تاني اللي قلته قبل كده في ظرف مشابه، طول ما السلطة فيها صراع داخلي واضح إنه موجود ومستعر وفي نفس الوقت لا آلياته ولا أطرافه ولا توازنات القوى بينهم واضحة ما ينفعش نصدق أي حاجة غير لما تحصل فعلا، لأن حتى لو وصلنا لمرحلة إن في قرار اتاخد ممكن حد يدخل على الخط ويخليه يتلغي طالما مااتنفذش".