-اتمخطري يا حلوة يا زينة يا وردة من جوة جنينة...اتمخطري يا بت يا نغشة وعريسك أبو سنجة منور الزفة!! هكذا كانت الفرقة تغني للعروسين وهما يتمخطران على السجادة الحمراء في الطريق الى الكوشة بينما تناثرت عليهما الورود والعملات الذهبية في القاعة التي تم حجزها ليلة واحدة بنص مليون جنية ... -مين الراجل العجوز ده اللي مكلبش في ايدين نوجة يا سوسو؟؟؟!!!!! -دا عريسها يا حبيبتي!! المعلم أبو سنجة أكبر راجل أعمال فيكي يا مغربلين!!! -مش ممكن يكون ده عريس نوجة؟؟ ...دا أد جدها يا بنتي !! وهنا فقد المعلم أبو سنجة أعصابه فترك ايدين العروسة وفرش الملاية للمدعوين: -أيوه انا أد جدها!! وعندي سبعين سنة بالصلاة ع النبي !! بس انا راجل مقتدر وكسيب وصحتى زي الفل وباشيل حديد وبألعب بوكس والفتوة فيكم يطلع لي !!! -الف مليون مبروك يا معلم وعقابل البكاري!! يا راجل كمل الزفة وما تاخدش في بالك!! ده كلام نسوان مخها لاسع!! وفي الزفة فوجيء أبو سنجة بمزيد من التعليقات السخيفة.. -هوه ماله كده يا اختي ضهره محني ومش قادر يصلب طوله!! يا راجل ده وشه يقطع الخميرة من البيت!!! شايفه يا بت التكشيرة اللي على وشه والسنجة الحديد اللي في ايده !!! يا نهار اسود يا اولاد معقولة البت نوجة الدلوعة القطقوطة تصوم تصوم ...وتفطر على بصلة!!! وهنا فقد أبو سنجة صوابه تماما وطاح: -يا غجر يا قلالات الادب !!! هوه انا عازمكم عشان تدلعوني والا تهزأوني ؟؟؟أنا صحيح كبير وماكانش لازم اتجوز تاني!! بس انا باحب نوجة وما اقدرش استغنى عنها أبداً!!!!! -وماله يا معلم ربنا يهنيكم ببعض !!! بس لازم تعرف ان الجوازة العاشرة غير الجوازة الاولانية!!! -فشر!!! دا أنا صحتي بمب وأقدر أتجوز طول ما انا عايش!!! ولعلمكم انا باموت في نوجة وح أستتها وأدلعها وأوريها اللي عمر أهلها ما شافته!!! وفي شهر العسل بدأ مسلسل الضرب والاهانة والطجرمة وقلة القيمة.. -أنا بامد ايدي عليكي يا نوجة وبأضربك بالجزمة عشان بأحبك !! يابت لازم تفهمي اني راجل حمش ودمي حامي وبأغير عليكي من الهوا الطاير!!! وبعد شهر العسل وضع المعلم نوجة في قفص حديد وأغلق بابه بالمفتاح، ورمى المفتاح في البحر مما جعلها تكلم نفسها: -أنا ح اتجنن يا ماما!! كل يوم يرجعلي وش الصبح سكران وشامم بودرة وينام في الصالة زي القتيل!! ولما اكلمه واعاتبه ينزل فيا ضرب لما خلا وشي شوارع!!! -طيب ما تهربي يا بنتي وتيجي تعيشي معانا معززة مكرمة في بيت ابوكي؟ -ما اقدرش ياماما ده راجل بلطجي وممكن يقتلني ويشرب من دمي ويخلص عليكم كلكم !!! وبعد فترة من الشجار والنقار أصيب المعلم أبو سنجة بحالة زهق غريبة وقرر ان يترك نوجة ويخلع من البلد... -أنا كان لازم اتجوز بت امريكانية اروح اعيش معاها في تكساس!! والا بت انجليزية اسكن معاها في الريف الانجليزي وكل يوم اروح اصطاد أرانب ويَا اصحابي اللوردات!! انا خلاص زهقت وقرفت من المغربلين واللي فيها!!!! وحانت الفرصة حين وصلت باحثة سويسرية شابة الى المغربلين لإعداد دراسة عن الفقر والجهل والمرض والفوضى والجوع والزبالة فتقدم أبو سنجة لخطبتها على أمل ان يأخذ الجنسية ويخلع!!! أنا؟!!! اتجوزك انت يا معلم أبو سنجة ؟؟!! ليه هيه الدنيا ما عدش فيها رجالة !؟؟ -يا بت ده انا ح أستتك وأدلعك وأسلطنك وأوريك اللي عمر أهلك ما شافوه!!! وكمان ح نروح نعيش مع بعض مع الست والدتك في سويسرا وأكَلك الشهد!!! لكن السويسرية رفضت وهربت الى بلدها على أول طائرة، فقرر أبو سنجة ان يبلط في المغربلين الى الأبد وطلب نوجة في بيت الطاعة لكنها صرخت في وجهه كنمرة جريحة: -يا راجل حرام عليك!! انت مش كنت ح تخلع على سويسرا مع البت السويسرية؟!!! انت ايه البعيد ما عندكش دم والا احساس والا مرؤة والا شهامة ؟؟؟ انا خلاص مش طايقاك ولا عايزة اعيش معاك وح ارفع عليك قضية خلع!!! وهنا تحول المعلم الى ثور هائج وأخذ يجعر لدرجة أن صوته جاب آخر حدود المغربلين .. -خلع مين يا أم خلع!! عليا الطلاق بالتلاتة لأرجعك لعصمتي وأخليكي على ذمتي بالجزمة القديمة طول ما أنا عايش!!! وح اشربك المُر في قزايز انتي واللي يتشددوا لك لغاية ما تقولي حقي برقبتي!! وبكرة تشوفي أبو سنجة ح يعمل فيكي وفي اللي خلفوكي إيه ؟؟!!!