عطشان والنيل قريب.. والقلب فيه لهيب.. والدنيا حر ولعة.. وحبيبى جنب الغريب.. يا نيل يا أسمر يا غالى.. ياما سهرت الليالى.. بيفكرنى بحبيب.. سحرك يشفى القلوب.. وأنا قلبى فيك يدوب.. والفرحة تملا عينى.. لما تكون لى قريب.. دلوقت يا نيل يا صاحبى.. خايف م المستخبى.. واللى مقدره ربى.. ومكتوب فوق الجبين.. خايف على ذكرى حلوة.. عايشة ف عقلى وقلبى.. وغزال أسمر بشطك.. فى عيونه حنان بيروى.. وآهات من قلبى طالعة.. لما الحلوة تعدى.. أنسج موالى طرحة.. وأهديها لها بيدى.. يا نيل يا أبو ميه حلوة.. ولكل حبيب بتروى.. شفت عمايل كبارنا.. نسيوك يا حلم عمرى.. وقصور ع الشط شاهدة.. ما عديتش الميه تجرى.. وسموم خرج المصانع.. مبيدات فى الجسم تهرى.. حالفين لينشفوك.. والميه فيك ما تجرى.. بكرة أو بعد بكرة.. ويا خوفى من بعد بكرة.. خايف لحفيدى يشقى.. وما يلاقى حتى شفطة.. من نيلنا السلسبيل.. ودلونى يا صبايا.. دلونى على السبيل.. عطشان والميه خفت.. مش باينه ف قعر النيل. رفعت محفوظ - الإسكندرية