كشف محمد محمود، رئيس اتحاد المصارعة، عن أسباب عدم حصول اللاعبين المصريين في لعبة المصارعة على ميدالية في دورة الألعاب الأولمبية المقامة حاليًا في العاصمة الفرنسية «باريس». وقال رئيس اتحاد المصارعة في تصريحات تليفزيونية عبر برنامج «الهدف» المذاع على قناة «أون تايم سبورتس 2»: «اتحاد المصارعة عمل كل حاجة وطلع اللعيبة كل المعسكرات الخارجية، بالنسبة لكيشو فهو طلع المعسكرات الخارجية ولعب قصاد بطل السودان، وكان مفروض يأدي أداء أحسن من كدة شوية». وأضاف: «90% من تراجع أداء كيشو هو التخسيس مأثر عليه بسبب أنه يشارك في الوزن اللي شارك فيه ده 67 كجم، فمكنش في حالته الطبيعية اللي تخليها ينافس بطل العالم في الميزان ده». وتابع: «عبداللطيف منيع عمل شغل هايل جدًا وكان بينه وبين الميدالية البرونزية نقطة واحدة، ولكن ظلم تحكيمي والعنصرية هي اللي خسرتنا الماتش». وأكمل: «محمد علي جبر عمل مفاجآة غير متوقعة وضرب المصنف الثالث والسابع، وعمل ماتشات هايلة ووصل للمباراة البرونزية وخسر، فالتوفيق ده بتاع ربنا سبحانه وتعالى». وأشار محمد محمود، إلى أن هناك خلل بالتأكيد تسبب في غياب الميدالية عن اللاعبين المصريين، ولازم يكون في خبير أجنبي عشان ده خلل فني، ومخدناش الخطوة دي قبل الأولمبياد عشان مكنش في وقت.