حذر الشيخ رمضان عبدالمعز، الداعية الإسلامي، من التهاون في حدود الله والتلاعب بها، مشددًا على أهمية الالتزام بالفرائض التي فرضها الله، مؤكدا أن من الناس يتهاونون في تطبيق حدود الله بشكل جاد. وقال الداعية الإسلامي، خلال حلقة برنامج «لعلهم يفقهون»، المذاع على فضائية «dmc»، اليوم الأحد: «الله فرض فرائض فلا تضيعوها، ما فيهاش هزار، وحد حدودًا فلا تعتدوها. زي إيه؟ «انت طالق وعلى الطلاق، وعلى الطلاق انت طالق، وعلى الطلاق تبقي طالق، إيه يا عم في إيه؟ أنت ما قَرَأتش سورة الطلاق ولا إيه؟ ده ربنا قال إن دي حدود ربنا.. لا تلعب بحدود ربنا.. إيه الرجالة اللي كل ما يتنفس ده يتنفس بالطلاق؟ عايز يحلف على عياله بالطلاق، عايز يحلف على أصحابه بالطلاق، بيبيع حاجة يحلف بالطلاق.. إيه يا عم في إيه؟ دي حدود ربنا.. ألا تتخذ آيات الله هزوًا؟.» وأضاف: «إن استخدام كلمة الطلاق بهذا الشكل يعتبر تعدياً على حدود الله، وقد جاء في سورة الطلاق أن (ومن يتعدى حدود الله فقد ظلم نفسه) احنا خايفين عليك يا أخي من عذاب ربنا. نداء إلى كل الرجال، إلى كل الرجال المحترمين، المؤمنين، المحبين لسيدنا النبي عليه الصلاة والسلام، شيل كلمة الطلاق دي من قاموسك.. الكلمة دي مش موجودة، مش موجودة، مش طالع طالق نازل طالق، انت طالق، تبقى طالق، على الطلاق. إيه يا عم في إيه؟ حدود ربنا، معقول يا جماعة الاستهانة بحدود الله؟ نتعامل كده بمنتهى البساطة يعني حدود ربنا؟ طيب، يبقى أن الله فرض فرائض فلا تضيعوها، وحد حدوداً فلا تعتدوها، وحرم أشياء فلا تنتهكوها».