كشف طارق العشري، مدرب الاتحاد السابق، عن كواليس ما حدث بعد سقوطه خلال المواجهة التي جمعت الفريق السكندري أمام مودرن فيوتشر، مارس الماضي. وقال طارق العشري: «أحمد رفعت دربته في إنبي، وكنت دائمًا أقوله ليك عندي نص ساعة أيام إنبي، هو مش بيتميز بالنواحي الدفاعية لكن بيتميز جدًا في النواحي الهجومية، فأقوله ليك نص ساعة وتنزل تخلص على الفرقة، قابلته في التراك قولتله طالما أنت قاعد احتياطي كنت جيت معانا ولعبت النص ساعة دي، قعد يضحك طبعًا ومفيش أي حاجة». وأضاف في تصريحات عبر قناة «إم بي سي مصر»: «في الدقيقتين الأخيرتين وقع وجرينا والحكم صفر بعدها دخلت الإسعاف كان فاقد الوعي تمامًا، دخل الأطباء في الأول وبعدين طلبوا الإسعاف». وأكمل: «كلنا روحنا المستشفى، كان في الإنعاش، الموقف نفسه كان رهيب، والموقف داخل غرفة الإنعاش مش مطمئن، إيه الأخبار يا دكتور؟ مفيش نبض، لدرجة إني سمعت الدكاترة بتقول إن في حوالي 30 أول فوق ال30 صدمة كهربا عشان ينشطوا، لحد ما في الآخر قاله الحمدلله النبض قعد».