مشاهد مصرية : الحلقة الاولى ( أول يوم رمضان ) ( المشهد الأول ) قبل أذان فجر أول يوم رمضان بدقيقة واحدة : -أسرة مصرية تقليدية على مائدة السحور و أمامهم الصحون الفارغة ويظهر في اللقطة بقايا قليلة من الفول المدمس و " حتة عيش " . -أنهى أفراد الأسرة الكريمة سحورهم الأسطوري ، ونظر كل منهم أمامه ليجد " ازازة ميَة لتر ونص " . -في تناسق تام وكأحدى عجائب الطبيعة يمسك كل فرد ب " ازازة الميَة " ويبدا في الشرب كالتائه في الصحراء دون ماء ، حتى يسمع الجميع صوت أذان الفجر القادم من الخمسة عشر مسجدا المحيطين بالمنزل . -رب الأسرة : كل سنة وانتوا طيبين يا ولاد ، نتقابل ع الفطار ان شاء الله . ( المشهد الثاني ) نفس منزل الأسرة الكريمة " بس " ظهرا : -رب الأسرة في عمله ، الأم في المطبخ تعد ما لذَ وطاب من الأطعمة للافطار الأوليمبي السنوي تساعدها ابنتها الكبرى . -باقي الاولاد في غرفهم غارقين في النوم انتظارا لسماع أذان المغرب . ( المشهد الثالث ) قبل أذان المغرب بدقائق قليلة : -مائدة الإفطار ممتلئة على آخرها بأصناف الطعام و الشراب بينما يجلس أفراد الأسرة حولها ، ينظرون بلهفة للطعام و الشراب ، ويتسابق الأطفال على سماع أول همسة من الأذان . -تظل اعينهم معلقة بين الساعة على الجدار وبين أكواب المياه أمامهم . -" الله أكبر الله أكبر " يسمع الجميع "نداء الصلاة " معلنا نهاية فترة الصوم الاولى ، أصوات " الصواريخ و البمب " تعلو و تبدأ في الازدياد ، يهجم الجميع على أكواب المياه وتبدأ كلمات الافطار المعتادة " ياااه كنتي فين من زمان " ، " ده أنا كنت حموت من العطش " ، " اذا كان ده أول يوم حنعمل ايه بعد كدة " ، " حد يجيب مسلسل نتفرج عليه ". ( المشهد الرابع ) بعد صلاة العشاء – و التراويح ان أمكن - : -أفراد الأسرة مجتمعون معا – وهو ما يعتبر سابقة تاريخية – أمام التليفزيون يتابعون احد المسلسلات الرمضانية التي لا يخرج سياقها عن " البلطجة والحشيش " ، " الظالمون و المظلومون " ، " سيرة احد الأعلام – وهو ما سيكون محورا لبرامج التوك شو فيما بعد نظرا للقضايا التي سترفع على المسلسل – " أو " مسلسلات من غير سياق أصلا " . ( المشهد الرابع ) في إحدى اللحظات النادرة التي يخرج فيها الشباب في نهار رمضان ، صابر و صديقه راضي " بيسلوا صيامهم " على حد قولهم : -صابر : مش عارف يا أخي رمضان السنة دي صعب أوي في الحر ده الله يرحم أيام زمان . -راضي : أيام زمان ايه يا اهبل انتا عمرك صومت في الشتا ؟! -صابر : اللهم اني صائم . -راضي : لا يا راجل ! -صابر : أيون . -راضي : طيب بالنسبة للبنت " الحرَانة " اللي سيادتك ماشي وراها من الصبح دي . -صابر : ايه ده فعلا !! تصدق ماكنتش واخد بالي .. كدة تخليني أبص . -راضي : حقك عليا أنا غلطان . -صابر : لا ولا يهمك ، بس تفتكر البنت دي رايحة فين ؟ -راضي : مش عارف . -صابر : أوك ، أدينا ماشيين وراها لمًا نشوف . -راضي : قشطة . -صابر : تفتكر نصلي التراويح فين النهاردة ؟ ( المشهد الخامس و الأخير ) مجموعة من اللقطات العامة: -موظفي المصالح الحكومية يرفعون شعار " لا يعمل أحد تفرغ لقراءة القران " . -سائقي التاكسي يرفعون شعار " الواحد صايم ومش طايق نفسة " . -الشباب في الجامعات و المدارس يرفعون شعار " متفطرنيش ". -البلدية ترفع شعار " وجد رمضان لنسترزق ". -الإعلام العربي يرفع الاريال . في نهاية المشاهد تعليق صوتي " الصيام عندنا يعني لمَة و فرحة واكل وشرب و مسلسلات.. جميل يكون عندنا الروح دي ، بس شهر رمضان شهر صوم وعبادة مش شهر تسلية .. صيامك مش حجة إنك تنام أو تسرف في الأكل أو تبقى مش طايق نفسك ، وصيامك مش معناه إنك تبطل أكل و شرب بس ، لا، نصوم عن كل حاجة غلط ممكن تتعمل .. " - قطع -