كشف عمر كمال عبدالواحد، نجم الفريق الأول لكرة القدم بنادي فيوتشر، عن تفاصيل معاناته مع فريق المصري البورسعيدي. وقال عمر كمال عبدالواحد، خلال برنامج «ملعب أون تايم»، المذاع عبر فضائية «أون تايم سبورتس»: «لعبت في المصري 4 سنوات الأمور كانت صعبة للغاية معي في أول موسمين لأني لم أشارك وحصلتلي حاجات كتير، لم أتأقلم مع حسام حسن، المدير الفني وقتها، حصلت خناقة بينا». وأوضح: «سبب المشكلة مع حسام حسن، انا كنت العب في مركز الجناح، كريم العراقي تعرض للطرد في أحد المباريات وحسام حسن، قرر إشراكي في مباراة الزمالك مركز الظهير الأيمن انا مبعرفش ألعب في المركز ده لأن مركزي الأساسي جناح، حسام حسن، اتضايق وزعل مني وأنا قولتله مش هعرف العب باك رايت». وتابع: «من هنا بدأ الخلاف مع حسام حسن، حيث تم استبعادي من المباريات وكنت اتواجد في بورسعيد ولم اذهب إلى المعسكر في برج العرب، بعد أول 6 اشهر انتقلت للأسيوطي إعارة». وواصل عمر كمال، تصريحاته باكيًا: «أنا شوفت فترة في المصري صعبة كنت هبطل كورة، وفي واحد لازم اشكره اسمه ابراهيم بيسا عامل أوضة اللبس، كان بيصرف عليا، وبيجبلي أكل، مكنتش ياخد فلوس من المصري لانهم حطوني قايمة انتظار، ويخصمون من مستحقاتي». وزاد: «بعد انتهاء إعارتي من الأسيوطي تلقيت عرضًا رسميًا من انبي، حسام حسن، قالي (مش همشيك) وحطني قايمة انتظار وقعدت في البيت، قالي (عشان تمشي لازم تيجي تتمرن) فروحت التمرين، وكنت لا احصل على مستحقاتي دي كانت أصعب فترة في حياتي» واسترسل: «فضلت مع المصري لحين تولي إيهاب جلال، تدريب الفريق جه (نفض التراب اللي عليا)، كان بيعاملني نفسيًا بشكل جيد، وكنت أشارك معه في المباريات».
