والدة ضحية زوجها في منشأة القناطر: «خنقها بإيديه عشان فلوس الجمعية» (فيديو وصور)

«أمى هتقبض الجمعية النهارده».. هكذا يقول الابن لوالده، فيقسم الأب: «والله ما عادت عايشة فى الدنيا يوم كمان»، وجلس ينتظر عودتها إلى المنزل للاستيلاء على أموالها، وبمجرد عودتها، تشاجر معها، وخنقها بيديه حتى سقطت جثة هامدة.
استولى الزوج على أموال زوجته، وعلى غير عادته ذهب مبكرًا لفتح محله لبيع الخردة، وهو يحمل طفله من زوجته الثانية، ويذهب به إلى الحضانة، لتبدى المُعلمة دهشتها وهى تقول: «فين مرات أبوه على طول بتجيبه؟!»، لكنه لم يرد عليها.
إلى جوار شريط القطار، تجلس «العجوز» وهى تبكى ابنتها «هيام»، ضحية زوجها، بمنزلها بقرية وردان فى منشأة القناطر بالجيزة: «(يونس) قتلها عشان عايز فلوس.. بنتى شغالة بتبيع خضار فى السوق.. بتجرى عليه تكسيه وتأكله وتشربه مع ابنهم.. بتصرف عليه هو ومراته التانية وابنهم، اللى كان بيقول لها (يا ماما)، وكل ليلة ينكد عليها ويضربها.. وليلة إمبارح كانت النهاية، جابها الساعة 2 بالليل وخنقها بإيديه».
وداع أخير قبل ساعات من مقتلها، كان مكالمة هاتفية من «هيام»، 44 سنة، بأمها المُسِنّة، تقول لها: «يا امّة هاجى لكم البيت، هجيب هدية لبنت أخويا العروسة عشان تحطها فى جهازها»، وترد عليها الأم: «يعينك ربنا على اللى انتى فيه».
«يونس» كتب نهاية زوجته على نحو مأساوى، عندما أخبره ابنه «محمد»: «أمى عاملة جمعية ب9 آلاف»، قبل أن يكمل له: «دى هتبقضها النهارده»، ليتوعدها: «مش هتعيش على وش الأرض تانى»، ويدخن بشرارة، تظهر أمامه «هيام»، يقبض على ما بحوزتها من أموال: «عايزة الفلوس دى ليه؟!»، وهى تقول له: «حرام عليك.. عليّا ديون، التجار عايزين فلوس الزرع، عليّا فلوس قسط التلاجة».
أم «هيام» تعتدل فى جلستها منتظرةً تسلم جثمان ابنتها: «البكرية اللى شالت وربت إخواتها»، تصرخ عليها: «كانت بتشتغل، وتجيب لجوزها، وتشقى، ومراته التانية تشغل الأغانى وتترقص، وهو بيسود عيشة بنتى»، وتروى حزينة بصوتها المبحوح: «ده خنقها بدل المرة اتنين وتلاتة قبل كده، آخر مرة جابت دم من عينيها، ووشها ازْرَقّ، جاب حتة تلجة، وحطها عليها، بعدما خنقها، والمرة دى ماتت».
وكأنها ترى الجريمة، الأم المكلومة تشير بيديها إلى بطنها، وتركل فى الهواء: «(يونس) بقى يضرب بنتى برجله فى معدتها، لما مصارينها اتقطعت.. وكمان خنقها بإيديه وهو بيقول لها: (هنقتلك.. دى نهايتك الليلة دى).. وهى تزق فيه، لحدما ماتت، وسلمت أمرها لله وفاضت روحها».
صديقات «هيام» فى الصباح الباكر لاحظوا غيابها على غير العادة، إحداهن، تُدعى «عايدة»، قالت: «هروح اطمن عليها، مش معقول تغيب عن السوق يوم واحد»، وتقابلت مع زوجها «يونس» أمام محله، كان متوترًا واندهشت لأنه فتح دكانه صباحًا: «مش عادتك تصحى 6 الصبح»، وسألته: «فين مراتك؟»، ليشيح بيده فى الهواء: «شوفيها تلاقيها ميتة!»، فتصرخ فى وجهه: «إنت بتهزر.. إنت بتقول إيه.. ماتت إزاى؟!».
«يا هيام ردى.. ردى عليا»، «عايدة» تصدح بها، والجيران يفزعون، يلتفون حول الزوج، يقيدون حركته، يطلبون سيارة الإسعاف، يصلون إلى المستشفى، الأطباء يقولون: «دى ميتة!».
ابن «هيام» يتصل بأخواله، قائلًا بصوت مرتعش: «تعالوا.. أمى ماتت!»، جدته مستنكرةً: «يا ابنى دى لسة مكلمانى بالليل، قالتلى إنها جاية!»، وبخطواتها الوئيدة تتوقف أمام جسد ابنتها المسجى، وتشير إلى الزوج: «قتلتها يا يونس؟!»، وطبيبة شابة تخبر المباحث: «فى ضوافر الست الميتة آثار لجلد وشعر، واضح إنها كانت بتقاوم»، وأم المجنى عليها تندب: «تلاقيها عمّالة تشد وتنازع، مقدرتش، سلمت أمرها لله، بنتى راحت يا قلبى عليها.. 20 سنة متحملة ومتبهدلة، كنا بنقول لها: بلاش تعيشى معاه، وهى تقول: عايزة أربى ابنى».
رجال المباحث على الفور يضبطون الزوج، وبتفتيشه عُثر على المبلغ، ليؤكد: «دى فلوس جمعية هيام»، ووالدة المجنى عليها تبكى بهستيرية: «قتلها، وخد الفلوس وجرى زى عادته، بنتى فتحت له محل يبيع فيه خُردة وحاجات قديمة، وماصانش الجميل!».