الغل مش طبعنا – راح فين ياناس حقنا – تعالوا نتحاسب – سؤال انا بسأله وإجابته مربوطه فيه – لو الكبير طبال هيكون صغيره إيه – هيكون صغيره إيه غير رقص ليل ونهار – الطبالين درجات والرقاصين درجات – وهناك واقفين بعيد ناس قاعده تتفرج – لا طبل بيطبلوا ولا رقص عارفينه – كل إللى عايزينه لقمه تسد الجوع – لو حتى مش بدود – بس يكون موجود – ودى واحده عند الفررارجى بتقوله ياشاكر – إوزن بسرعه قوام إتنين كيلو هياكل –أصل النهارده الخميس خلى الراجل ياكل – خلى العيال تاكل وتمصمص الجناحات – خلص ياشاكر هات – إستنى صبرك شويه قالها شاكر – أول ما دخلت عليهم واحده من الأمرات – تأمرنى ست البنات – م البط هات دكرين بس يكونوا حلويين – ديك رومى أنا عايزاه بطبله منفوخه – وكمان معاهم فيليه – وإياك تنسى الوراك – وإبعت قوام عالبيت - تأمرنى ست البنات – والثانيه وقفت بعيد فى ركن فى الدكان – وبصوت واطى قالت له – قوللى ياشاكر قول – الحلوه تطلع مين – رد عليها وقال – عقبالى والسامعين – جوزها موظف ياستى فى الوحده المحليه – قالت ياشاكر هات – ماهو البشر درجات – وجوزها الغلبان قاعد ساعه راحه – قاعد فى شغله هناك فى مدينه الواحه – وصحابه قاعدين معاه الكل يشرب شاى – قاله زميله بشاى – تقدر تقوللى ياأبو أحمد القصر من دول بكام – قاله وأنا أعرف منين – رد الغفير قاله بتلات أرانب قول – رد عليه منصور سواق سعاده البيه – يابنى تلاته إيه – مش أقل من خمسه – خمس أرانب يادوب عالفيلا دى ماتخلص – جابوا الفلوس دى منين سأله ابو احمد – رد عليه منصور إسمع بقى ياسيدى البيه بتاعنا دا شغله يبقى فى بنك كبير – وفيلته جنبها واحده لأبن وزير – والتالته إللى هناك صاحبها ظابط كبير – ظابط من إللى زمان كانوا من الأسياد - والرابعه والخامسه دول لموظفين فى الجهاز – والسادسه ديا لواحده بملف فى الآداب – والسابعه دى لدكتور فى مستشفى كبير - من إللى بيسرقوا فيه الكليه والطحال – والتامنه بينى وبينك صاحبها عنده بازار وسمعت إنه كمان بيهرب الآثار – والتاسعه لمذيع كبير طيب وإبن حلال وكل شغله علينا ( مصر النهارده فين ) – والعاشره دى صاحبها صحفى وبيعارض – على إيه بقى يعارض – ودى بقى لمدير – مدير ضرايب كبير – وواحده لصاحب حصانه كان يوم فى البرلمان – والقصرإللى بعيد دا صاحبه إسمه الحوت – الحوت دا تاجر كبير – بيقولوا تاجر كيف – وقف أبو احمد وقال قوم بينا يابشاى قوم – ماهو البشر درجات – ومشى وعدى اليوم – عربيه نقل جابوها – الكل يركب قوام – الكل فى الصندوق – الكل عايز يروح أصل الليلادى خميس – مشيت خلاص مشيت و عالطريق طلعت – والكل يتفرج - قصور يمين وشمال والنخل زاينها – واللا يامصر عمار – دى كلها ملايين – وعاليمين والشمال بتمشى عربيات – مش أى عربيات – دى كلها زيروا – زيروا و سايقها عيال – جابوا فلوسها منين – قولولنا مش عارفين – نشغل دماغنا ليه – قالها أبو أحمد – ماهو البشر درجات –إستنى وقف هناك – إستنى نزلنى – نزل أبو أحمد وراح على مقله مشهوره – واقف هناك عندها باشا من البشوات – ومعاه كمان ياناس واحده من الأمرات – إدينى خلص قوام هات لب وسودانى – ولوز وجوز إوعى تنسى – والكاجو هاتلى كمان – عين الجمل والصنيبر كنا هننساهم – خلص بسرعه قوام – ميل أبو أحمد عليه – ميل على البياع – ميل عليه وشوشه ماتيالا مشينى – ناولنى بقى تمن سوبر - قوام ودارينى – مشى أبو أحمد خلاص – رايح خلاص عالبيت – سرح فى حاله وقال – يارب أنا راضى – حامد وشاكر يارب – لكنه فين العدل – العدل فين ودووه – يا أخوانا فين العدل – صرخ فى وسط الناس – ياناس فين العدل – بأقولها من تانى - وهأقول وأعيد تانى – الغل مش طبعنا – راح فين ياناس حقنا – تعالوا نتحاسب – مين اللى هيحاسب – طب مين يحاسب مين – قولولى يا إخوانا – دا مفيش غير( ربنا ) هو اللى هيحاسب - لازم هنتحاسب – كله هيتحاسب .
