ماحدث أمام وزارة البترول .. ومشاهد من ميدان البروتوكول

بسم الله الرحمن الرحيم
أنا مش عاوز أرغى كتير فى موضوع أحنا اعتصمنا ليه ومعتصمناش ليه والكلام ده كله و هحاول أختصر فى كلامى وأنقل مشاهد حصلت أمام الوزارة وأرد على كلام أتقال الفترة دى بلغة بعيداً عن التكلف، وياريت الناس تفهم أن ده مش تبرير لأن الغاية لا تبرر الوسيلة أبداً ولم يكن يجب أن يحدث أى شىء فيه عنف ولا أقول أننا لم نخطأ مع أنى لم أشارك فى ده وكنت همشى أكتر من مرة بسبب محاولات الخروج عن النص لكنى كنت هناك وواقف مع الناس وزيى زيهم ولكن أيضاً تم المبالغة فى نقل وتصوير الأمر وأحاول هنا نقل ما رأيته وحدث أمامى إليكم
والله على ما أقول شهيد
سبب الاعتصام :
من سنة و 6 شهور تقريبا تم توقيع بروتوكول تعاون بين وزارة التعليم العالى والبترول يشمل تطوير المناهج و مبانى ومعامل الكلية لتتناسب مع امكانيات الطلاب اللى المفروض انهم من اوائل الثانوية العامة وانهم من خيرة عقول البلد كما يشمل تدريبهم وتجهيزهم عمليا لسوق العمل بالاضافة لتوفير فرص العمل بعد التخرج عن طريق التكليف وفيه لجنة معمولة من سنة لتفعيل البروتوكول ولكنها مجتمعتش منذ شهر 9 الماضى ( وأنا عن نفسى شايف انى لو اتجهزت لسوق العمل كويس عن طريق مناهج ومعامل وتدريب الشغل هوه اللى هيجيلى لحد عندى)
أولاً بالنسبة لموضوع أننا مستعجلين وأن التغيير قادم، لو أنت كنت وقفت معانا عند الوزارة كنت هتعرف ان كل اللى طلبناه اننا نقابل الوزير واعتقد من حق اى مواطن مصرى يقابل الوزير
نقابله ليه ؟ احنا مش عاوزين الناس تشتغل الصبح ولا عاوزه يعملى اللى انا عاوزه بكرة او بعده والكلام ده اتقال لرائد بالجيش ان كل المشكلة ان احنا عاوزين جدول زمنى معقول واليات للتنفيذ يعنى يقولى هيعمل ايه علشان ينفذ البروتوكول وجدول زمنى واضح بعد شهر اتنين سنة مش مشكلة المهم انه يلتزم بيه بورق رسمى وكل قبادات الجيش اللى كانوا موجودين اعترفوا بحقوقنا وان لينا حق واننا متافهمين لدرجة
طيب مهو اجتمع معاكم اول يوم ايه اللى حصل ؟
فعلاً أجتمع مع ممثلين من الطلبة لمدة تقريبا فى حدود 10 دقايق بعد مانتظروه لمدة 3 ساعات وتم سحب بطاقاتهم وموبيلاتهم
وكان مجمل الكلام انا مش ملتزم بتوقيع الوزير السابق انا قاعد معاكم بشكل ودى اللجنة هتجتمع كمان 10 ايام وتشوف ايه اللى ممكن يتعمل وفرصتين تدريب بدل من فرصة
وطبعا معظم الناس رفضت الموضوع لما عرفت ولما جه ممثل الطلبة يرجع علشان يبلغ الوزير بالرفض معرفش يقابله بالاضافة الى ان الوزير اعتصموا فى الجنينة 10 ايام لحد ما صوتكم يروح وتزهقوا وانا مش هسال فيكم ومش عليا اى ضغوط
طيب ليه استخدمتم العنف ؟
انا هذكر ليكم كذا موقف حصل وانتم احكموا
اول يوم عمال بتروميد جم عند الوزارة بعدنا ووقفوا عند المدخل من ناحية شركة انبى وعند خروج احد الموظفين اقتحموا الباب ودخلوا جوه بالعافية
كان موقفنا اننا رفضنا الموضوع كطلبة هندسة بترول وتعدين ووقفنا خارج الوزارة ورفضنا اننا ندخل وقولنا احنا جايين عاوزين نقابل الوزير وهنطلب حقنا باحترام
عمال بتروميد ايضا قرر بعضهم انهم يقطعوا الطريق واحنا رفضنا الموضوع تماما وعملنا كردون علينا وقفلنا المكان حوالينا كطلبة بترول وتعدين ورفضنا اللى بيعملوه وبعدنا عنهم لحد ما هما رجعوا فى كلامهم ومقطعوش الطريق واعتقد انهم فشلوا فى كده لاننا رفضنا المشاركة معهم فى اى شىء مع ان عددنا كان تقريبا 300 طالب
تالت يوم تقريبا اللى هوه يوم الاربعاء قام مجموعة من شباب الخريجين بمحاولة خنق الطريق بالسماح بالمرور فى حارة واحدة واندفع عدد قليل جدا من الطلبة معهم لا يتعدوا اتنين او تلاتة ولكننا كطلبة بترول وتعدين السويس وقفنا وهتفنا ورفضنا اللى بيحصل وكان كل كلامنا اننا جايين هنا نطالب بحقنا والطريق ده حق الناس اللى ماشية فيه يبقى مش من حقنا نقطع الطريق
ولم تستمر العملية اكتر من 5 دقايق وتم فضها لرفضنا كطلبة لهذا الاسلوب
تكررت هذه الواقعة مرة اخرى وكان لنا نفس الموقف وكان رايهم انهم اعتصموا هنا لمرات عديدة ولما يعبرهم احد فكان لابد من اثارة الانتباه وكان ردنا ان المطالبة بحقنا لا تسمح لنا بالتعدى على حقوق الاخرين وتم انهاء الموضوع مرة اخرى وفى كل مرة لم يستمر
لدقائق معدودة وكان ليا الشرف شخصيا انى حصلت مشادة كلامية بينى وبين اتنين من شباب الخريجين بسبب اعتراضى على موضوع قطع الطريق
طيب وقفل مداخل شركة انبى ؟؟؟؟
لما رفضنا موضوع قطع الطريق كان مبررنا اننا هنا علشان ناخد حقنا ومشكلتنا مع الوزارة ومش مع الناس اللى فى الشارع
كان الوقت يوم الاربعاء والناس بدات تفقد اعصابها لانها بقالها 3 ايام نايمة فى الشارع فى البرد ومحدش معبرها ولا بيسال فيها ومحدش بيخرج من الباب اللى احنا قدامه والوزير بيخرج من باب تانى فكانت الفكرة اننا عاوزينه ميخرجش لحد ما يقابلنا فقررنا نقفل المداخل اللى موجودة قدامنا وكانت انبى ومعهد البحوث لكن مكنش فيه اكتر من الابواب ولما الناس اقتنعت ان دى مصالح الشركة وانهم ملهمش ذنب وان مفيش فايدة لان الابواب كتير وهوه بيخرج من باب تانى تم انهاء الفكرة ولم تستمر اكثر من 10 دقايق ايضا
واقتحام باب الوزارة فى اخر يوم ؟؟؟؟؟؟؟؟
اولا ده مكنش اقتحام وهيترد عليه فى وسط الكلام
اليوم ده كان يوم الخميس والناس بلغت ذروتها مش بسبب انها يقالها 4 ايام و 3 ليالى فى الشارع ومحدش مهتم لكن لان بعد كده جمعة وسبت واحد واتنين الوزارة اجازة ومش هيبقى فيه فايدة من الاعتصام ده غير الاحساس اللى بقى عند كل الناس ان فيه مماطلة وتنييم لينا لان كل يوم الصبح يتقالنا خلاص هتقابلوا الوزير النهاردة وكل اللى عاوزينه هيتنفذ وبيعدى اليوم من غير ميحصل حاجة ده غير ان يوم الاربعاء عميد الكلية بدرجة استاذ دكتور ورغم اختلافى معه لان تفعيل البروتوكول وتطوير المناهج والمبانى هى مسؤولية العميد وادارة الكلية وزى ما قولت للناس هناك اننا واقفين هنا علشان ادارة كليتنا مشافتش شغلها حضر لمقابلة الوزير اللى هوه مهندس ومعرفش يقابله وكان وعد عقيد الجيش اننا هنقابل الوزير تانى يوم الساعة 10 صباحا وانتظرنا يوم الخميس لحد الساعة 11 تقريبا ولم يجد اى جديد
الناس خلاص مش شايفة ان فيه امل وان هما هينيمونا لحد ماليوم ينتهى ويفضوا الاعتصام زى ما عملوا يوم الاربعاء والناس نايمة بالليل وطردوهم من الجنينة علشان حظر التجول مع ان كان فيه ناس عالقهوة بتشرب حشيش لم يعترضها احد
الموقف اللى اتفقنا عليه اننا هنعمل ازعاج لحد ما يعبرنا الازعاج بدأ بالصوت اولا صفير وهيصة بعد كده الناس بدأت تخبط عالبوابة زى ما بيحصل فى كثير من المظاهرات بره انهم بيخبطوا بحديدتين على بعض للازعاج
الناس مسكت طوب وخبطت على البوابة ولم تسقط طوبة واحدة داخل الوزارة لاننا مش جايين نخرب واصلا المبنى كله ازاز بس الفكرة تخبيط على الباب للازعاج وكل ده كان فى وجود الجيش والشرطة العسكرية ومحدش اعترض علينا علشان عارفين اننا بنخبط بس
طيب وبعدين ؟؟؟؟؟
الناس وهى بتخبط عالباب امن الوزارة قعدوا يضحكوا عليهم ويستفزوهم وبدأوا يمسكوا خشب وكان فيه واحد معاه سنجة
سنجة ؟ اه سنجة فى وزارة البترول حد يقول بتعمل ايه مع الامن
مع الاستفزاز الناس بدأت تهز الباب بطريقة اكبر وكان الصوت اعلى فبدأ امن الوزارة يتعامل مع الناس من الداخل عن طريق الضرب بالعصى وكله متصور وواحد صباعه انكسر واخر اصيب فى راسه الناس شاطت اكتر من اللى حصل فزاد موضوع هز الباب الفكرة عند ناس انهم يخلعوا الباب وناس مش شايفة كده بس مش كل الناس طبعا كانت موافقة على كده بالعكس اغلبية رافضة للعنف لكن مكنتش فكرة الاقتحام موجودة هما كانوا بيستفزونا والناس بتخرج طاقتها على الباب خصوصا بعد ما الامن بدأ يرش المياه ويستخدم طفايات الحريق علينا وطبعا هما يستفزونا وناس واقفة فى مبانى تبع الوزارة بتصورنا
لحد ما لواء الشرطة العسكرية حضر وتم الاتفاق على دخول ممثلين معاه لمقابلة الوزير لعرض المطالب وهوه ده كان كل طلبنا لمدة 4 ايام يعنى لا جايين نخرب ولا نكسر
ولم نحتك باحد من الجيش ولا الشرطة العسكرية
ما ينشر فى الاعلام الفاسد :
هوه موضوع ان كل الصحف والجرايد كاتبه الخبر بنفس الطريقة ( كوبى وبست ) ده لم يثير انتباهك ؟؟؟؟؟؟؟؟؟
الناس معتصمة 4 ايام هناك والتليفزيون المصرى جاء للتصوير ولم يذع شىء ولم يهتم احد اعلاميا رغم ان الناس كانت 24 ساعة بتبعت للصحفيين والتليفزيون صور وفيديوهات عن اللى بيحصل ولم يهتم احد
فى حين انه تم اتهامنا باقتحام الباب والبلطجة علشان ربع ساعة الناس اعدت تهز الباب وتخبط عليه كتبت الخبر كل المجلات والجرايد المستقلة الغير مستقلة بنفس الصيغة بل انها كانت رحيمة بنا لانها لم تفعل مثل الجريدة القومية اللى اسمها احرار اليوم لما قالت اننا كنا بنرقص وبنغنى وكانوا بيدوروا على طلعت زكريا علشان يقول فيه علاقات جنسية كاملة ده كله لا يثير الانتباه ؟؟؟؟؟؟؟
الم تستشعر ان هناك حملة لتشويه صورتنا امام الراى العام ؟؟؟؟؟؟؟
حسبى الله ونعم الوكيل فى اعلامنا الفاسد ومن ادار هذه الحملة
لو احنا جايين نكسر طيب ليه مشينا؟
تعرفوا اننا علقنا الاعتصام لما الوزير قال انه خلاص ملتزم ببنود البروتوكول وان اللجنة هتجتمع يوم الخميس بحضور ممثلين من الطلبة وعميد الكلية لبحث اليات التنفيذ ووضع جدول زمنى وكان الضامن فقط هوه لواء الشرطة العسكرية يعنى المشكلة كانت بسيطة جدا عقد موقع ولجنة مشكلة منذ سنة كل طلبنا انهم يشوفوا شغلهم يا لجنة شوفى شغلك بقى وقوليلنا ناوية تعملى ايه حسب ظروفك بس ده كل اللى طلبناه
يعنى الموضوع مكنش موضوع اننا عاوزين ضمانة للشغل ولا حاجة زى ما كل الجرائد القذرة والصحف الخاصة الفاسدة قالت اننا حاولنا اقتحام الوزارة علشان عاوزين ضمانة للشغل
احنا بعمل كده علشان نفسنا ؟؟؟؟؟؟
هتكلم عن نفسى وان كان الكلام ينطبق على معظم اللى كانوا هناك ان الاولية عندى كانت لتطوير الكلية من مناهج ومعامل ومبانى بما يعود بالنفع عالطلبة اللى جايين بعد كده ان شاء الله اللى هما وهقول تانى من خيرة عقول هذا البلد يعنى ان شاء الله لما اتخرج قريب انا مش هستفيد حاجة من ده كله الا التكليف اللى هوه ممكن ينطبق علي دفعتى او الدفعة اللى بعدى يعنى ممكن مستفيدش
الدافع الوحيد ليا هناك ان مش عاوز 500 طالب كل سنة من اوائل الثانوية وخيرة العقول فى البلد اللى المفروض هما وقود البلد ومستقبلها والاساس الذى سيتم البناء عليه يتم دفنهم كل عام فى كلية بلا مناهج ولا معامل ولا مبانى
عملنا كده علشان الناس اللى جاية بعدنا وبعدهم ميحصلش فيهم اللى حصل فينا
عملنا كده علشان كليتنا تبقى احسن علشان بلدنا تبقى احسن
يمكن الناس تلوم علينا ان ده مش وقته وان حال البلد ميسمحش
لكن احنا مطلبناش الاستعجال فى تنفيذ الطالب ولكننا طلبنا الاعتراف بهذه المطالب وحقنا فيه ووضع الية للتنفيذ حتى لو كانت على المدى البعيد وهو ما تم رفضه فى اول لقاء مع الوزير الذى رفض الاعتراف بورقة موقعة من الوزير السابق
كما انى مستعد للنزول والاعتصام مرة اخرى اذا لم يكن هناك جدية فى تنفيذ الوعود بمعنى اذا لم تكن هناك قرارات واضحة عن لجنة تفعيل البروتوكول يوم الخميس القادم
عتاب رقيق
عتابى هنا على اخوانى من الطلاب الذين كانوا يؤيدون فكرة الاعتصام ولم تنعهم ظروفهم من الحضور ولكنهم لم يحضروا تكاسلا منهم لان عدم مشاركتهم اظهرتنا كما قيل لنا اننا اللى جايبين مقبول وفاشلين ومبلطين فى الكلية وجايين عاوزين نشتغل واننا لو عددنا كبير كان اتعمل اللى احنا عاوزينه وفين زمايلكم وهذا عتاب الاخوة
وتبقى دائما حرية الراى هى الاساس بشرط احترام راى الاخرين وان الفكر ليس حجرا على احد ولا يجب ان يكون هناك ادعاء للبطولة او مهاجمة لمن لم يشاركوا ربما يكونوا هم على صواب ونكون مخطئين اذا لم نكن نحن من هم على صواب
والله المستعان والموفق .