قديما كانت تعرف ببحيرة «الصيادين» واشتهرت بأنها إحدى أهم مناطق الصيد فى الإسماعيلية لأن جميع سكانها يعملون فى مهنة الصيد، أما الآن وتحديدا منذ حرب الخليج عام 1992 وتنظيم عمليات الصيد ثم منعها تماما لإجراءات أمنية، أطلق عليها سكانها اسم «بحيرة الشحاتين». شوادر لبيع الأسماك يقف بها صيادون تحولوا فى ليلة وضحاها إلى تجار متهمين بأنهم السبب وراء ارتفاع أسعار الأسماك، ومراكب صيد متراصة تنتظر من يجازف بحياته ليخرج بها إلى مياه القناة والبحيرات المحظورة ليصطاد.. هكذا أصبح صيادو الإسماعيلية يسرقون مصدر رزقهم فى عتمة الليل خوفا من أمن السواحل. ويروى عم عربى مشكلتهم قائلا: «مشكلتنا بدأت من بعد حرب الخليج لما بقى فيه تنظيم لمواعيد الصيد وكنا راضيين بيها رغم إننا ماكناش بنلاقى سمك فى الأوقات المحددة، لكن الوضع دلوقتى بقى صعب جدا إحنا 15 ألف أسرة تقريبا رزقهم الوحيد صيد السمك ولما يمنعوا الصيد فى البحيرة وفى القناة عشان خاطر البوابير اللى بتعدى فى القناة يبقى نعيش منين ونربى عيالنا إزاى؟». منع الصيد فى القناة وبحيرات الإسماعيلية، لم يكن سببا كفيلاً لوقف دفع الصيادين لمصاريف التأمين على مراكبهم أو تراخيص أكشاكهم، فهم مستمرون فى دفع التأمينات والضرائب وإن كانوا لا يعملون فى مهنة الصيد، ويوضح أشرف فياض: «بدفع تأمين وضرائب حوالى 600 جنيه وأنا أصلا مابشتغلش على المركب لأنى ماقدرش أجازف بحياتى عشان أصطاد من البحر الممنوع، وكل إلّلى بعمله إنى ببيع سمك بتديهولى الثروة السمكية أو أى صياد بيجازف وينزل البحر عشان يصطاد ومع كل دا بيتهمونا الزباين أننا بنغلى أسعار السمك وهما مايعرفوش أصل الموضوع وإننا مابنكسبش 10 جنيه فى اليوم لأن السمك مش بتاعنا». رغم مشكلاتهم المتعددة، فإن صيادى الإسماعيلية مازالوا مسالمين ويحاولون أن يطالبوا بحقوقهم بالطرق المشروعة سواء بالشكوى أوالتظاهر، كما أنهم أبدوا استعدادهم لتغيير نشاطهم حتى يتمكنوا من إعالة أسرهم، وقال وليد عمر أحد بائعى الأسماك حاليا وصياد سابق: «إحنا مش عايزين غير إننا نعيش ولو وفروا لنا شغل تانى ممكن نسيب الصيد، بس هما لا بيسمحولنا نصطاد ولا بيجبولنا شغل، كمان مش منطقى إن الصياد إلّى ينزل يجيب أكل عيشه يدفع غرامة 500 جنيه وياخد حبس 3 شهور!». ويظل حلم هؤلاء الصيادين هو العودة إلى أوضاعهم التى سبقت حرب الخليج، أو الحصول على مهن بديلة أو تسلم المبالغ المالية التى يؤكدون أنها خصصت كتعويض للصيادين المتضررين من مرور البوابير الحربية فى القناة، وقال الصياد هشام فؤاد: «عرفنا ومتأكدين إن أمريكا بتخصص فلوس للصيادين المتضررين حوالى 2500 جنيه لكل صياد، بس إحنا ماشفناش حاجة».
