في هذا المجتمع الجميل تم التعارف على إن "فلان تربية ستات" تستخدم كنوع من أنواع التقليل وفوات فرصة تعلمه للرجولة وأصولها، مع إن الرجولة دي ممكن يتعلمها في المدرسة في النادي في الشارع على القهوة في الشغل أو من صحابه في الجامع واخدلي بالك إنت من الجامع:D، مش ده المهم، المهم بقى إنه لما بيطلع راجل قوي وتربية رجالة، بيطلع مخلوق ما يعرفش أي حاجة عن الستات، ومش المقصود هنا يعرف أسرار خفية عن نفسية الست لا سمح الله، المقصود بالمعرفة هنا هي المعرفة الأولىة السطحية جدا، ويترتب على هذا عزيزي المشاهد إنه مع أول علاقة عاطفية يتعرف فيها على هذا المخلوق المسمى ست بيصدم صدمة ينتج عنها تصرفات غريبة عجيبة جراء جهلة الشديد بكل حاجة تخص هذا الصنف من الكائنات المسمى ستات. الأنيل بقى يا صديقى لو كانت أول علاقة دي هي جواز على طول، سيدي يا سيدي على الجمال، كأنك جيبت لو واحد كلب ولا قطة بيتعرف عليه بقى من جميع النواحي، الصوت ده معناه إنها جعانة، الفرك ده معناه إنها محتاجة تلعب، الكسل ده معناه إنها عيانة، فيبدأ يتعب من كمية الأشارات واللغات اللي مش فاهمها، كمان بيكتشف إن ليها طلبات، فيبدأ يزهق ويتخانق ويتعصب. فيعمل إيه؟! ينزل الشارع أو القهوة أو الشغل أو النادي (الأماكن اللي اتعلم فيه رجولته) يعاكس ويتحرش ويقولك صنف إبن تيت يستاهل مش عارف إيه، ويروح بيتهم آخر اليوم يكمل رجولته على مراته، الأنيل وأنيل من كدة هو إنه أثناء تواجده في الأماكن السالف ذكرها بيفتح باب النقاش مع صحابه عن الموضوع الجديد اللي اسمه ستات ده، ويكونوا نظريات من خبرتهم كرجالة تربية رجالة ويخلصوا قعدتهم بفخر شديد لما توصلوا إليه (بحب قوي أنا البرنس اللي يميل عليك ويعرض صوته ويقولك الستات دول بلا بلا بلا) بص عليه من الزاوية دي هيصعب عليك قوي، مسكين يا عيني مخلوق اتخلق في الدنيا ما يعرفش غير مخلوقات شبهه، صحي في يوم وليلة على مخلوقات تانية مش شبهه، ينطبق عليه تماما المثل القائل "واحد مصاحب على علوكا وأشرف كوخا عايزه يطلع إيه؟! طيار!!" لازم طبعا يزعق عمال على بطال ويعتبر غياب البوكسر الأحمر في أزرق دليل على فشلها، ويطبل على كرشه وهو بيقولها مش ملاحظة إنك طخينة شوية.... أظن أظن كمان مرة أظن إننا محتاجين جيل تربية ستات يمكن يبقوا رجالة.
