زمان قبل العيد كنا نقعد كلنا حوالينا ( تيته ) ونساعدها في عمل الكحك والبسكويت، طول الليل لحد الصبح ونشيل ( الصاجات ) ونجرى على ( الفرن ) ولما يخلصوا نروح نجبهم ( وريحة الكحك ) تملى البيت ونبقى مبسوطين أوى. وكل واحد يقول دى الكحكة اللى انا عملاها بإيدى ودى البسكوتة اللى تعبتنى، وانا عملت أكتر منكم أصل انا عديت كام واحدة عملتها ! وانتى عملتى كام ؟ انا أكتر، لا أنا اللى أكتر ( وأكننا احنا العيال اللى عاملين كل حاجة ) والكبار كانوا بيساعدونا وفى الأخر كل اللى اتعمل بيتأكل، بس الحقيقة مفيش أحلى من كحك وبسكويت ( تيته ) الله يرحمها. العيد زمان وفرحته كان ليها طعم تانى، و( عيد الفطر ) ولمته حوالينا حاجة كلنا بنشارك فيها وبنأكلها مع بعض ( لمة ليها روح ) محدش يقدر يوصفها ويحسها إلا داقها بس. لكن دلوقتى خلاص قليل اللى بيعمل، ( بسكو مصر ) إحتل الأسواق، والجاهز ريح ست البيت وحرمها من اللمة الحلوة ( مع أن هي كانت حلوة بس ) بوجود ( تيته وجدو ) الله يرحمهما !