الكلمتين اللي جايين دول لكل بنت مش شايفة نفسها حلوة كفاية، ولكل بنت مش عاجبها شكل وشها أو جسمها، ودايما بتركز في كل عيب وعاملة منه "كارثة تهدد بقائها". اللي أنا عايزة أقوله لك، من غير خالص ما أقول لك إن:"الجمال جمال الروح"، عشان طبعا سمعتي كدة كتير، وعشان ده مش مقنع أوي لو شعرك الخشن عامل لك أزمة مع كل مشط، أو سنانك اللي مش مظبوطة عاملة لك حاجز نفسي مع أي ضحكة. بس لازم تبقي عارفة إنه عادي جدا، لو كنتي كلبوظة شويتين، أو رفيعة أوي، وعادي لو ما كنتيش أجمل بنت في صاحباتك، ولا أكتر واحدة جسمك حلو فيهم، وعادي لو خرجتي من البيت من غير ما تحطي أي ماكياج، وعادي لو نزلتي بكوتشي، وعادي إنك تروحي الفرح من غير كعب 25 سم، بدل ما تتعذبي زينا كلنا، وفي الآخر تقلعي اللي في رجلك وتقعدي حافية لو الفستان طويل عشان ماحدش يشوف رجلك، وعادي جدا برضه، لو وشك فيه حبوب، أو هالات سودة، أو شعرك منكوش، وعادي لو كنتي قصيرة أو طويلة زيادة، وعادي برضه لو سنانك مش مظبوطة على الآخر، وعادي لو ما كنتيش لابسة زي كل البنات البنطلون اللي كله ألوان ورسومات ده، عشان مش لايق عليكي، وعادي جدا لما تبقى عندك شكل للحجاب بتاعك مالوش علاقة باللي أشهر مصممة أزياء بتقوله . إنتي مش شكلك، ولا ال5 و10 أو حتي 50 كيلو زيادة اللي على وزنك، ولا إنتي بشرتك التعبانة, ولا إنتي شعرك اللي مش بتوديه الكوافير كل أسبوع, ولا إنتي اللي غلطانة عشان مش عارفة تمشي براحتك في الشارع، ولا إنتي المعاكسة اللي بتتعاكسيها، إنتي حلوة عشان إنتي حلوة، إنتي حلوة عشان إنتي "الإنسانة" اللي جوا الشعر والهدوم، والماكياج، إنتي الروح الحلوة والضحكة اللي طالعة من القلب، وإنتي الأغنية اللي بتغنيها مع صاحباتك وإنتو فرحانين من غير ما يكون صوتكو حلو أوي يعني، وإنتي الحب اللي بتديه لكل اللي حواليكي، وإنتي فرحتك بنجاحك وإنتي النور اللي الناس بتشوفه فيكي. قولي للي بتحبيهم إنك بتحبيهم، وإفرحي من قلب قلبك لما تفرحي، وإضحكي في الشارع بصوت عالي لو لازم تضحكي، وكلي أيس كريم في الشارع ومش مشكلة لو لحوستي نفسك، وإنزلي من بيتك باللبس اللي يخليكي حلوة في عينيكي إنتي الأول مش في عيون الناس، ولو شعرك عاجبك أوي وهو منكوش سيبيه منكوش، ولو شوية الكيلوهات الزيادة مش مضايقينك إوعي تخسي، ولو مش بتحبي حد أو حد مضايقك في الشغل أو في عيلتك، ما تشيليهوش حمل على قلبك وتمشي بيه، تجاهلي وجوده، وإفرحي. إنتي مش تجاربك الفاشلة، ولا الحب اللي ما كملش، ولا إنتي سنك اللي بقى 24 أو 28 أو 30 أو 40 ولسة متجوزتيش، ولا مضطرة تقولي إنتي ليه بتتجوزي أو ليه ما اتجوزتيش . آخر حاجة لازم تعرفيها، إن الجمال مش هأقول لك نسبي وكدة، لأ ولا هأقول لك: بكرة تلاقي اللي يقدر جمالك، بس هأقول لك، إن إنتي اللي بتقدري جمالك، قبل أي حد تاني، وجمالك ده لازم يبقى جمالك إنتي، مش جمال أنجيلينا جولي، ولا ضحكة جوليا روبرتس، ولا فستان من تصميم هاني البحيري، اللي مرصع بالأحجار الكريمة اللي مستخرجة من أعلى قمة جبل في بلاد ما وراء الأربع أنهار. الجمال، هو شكلك إنتي، باللي زايد واللي ناقص فيه!
