كلمة تخوف .. بس احنا اللى عملناها .. اه ... عندك 20 ولا 30 ولا 60 سنة حتى هو انتى كبنت ليكى فترة صلاحية مثلا تبوظ فتترمي .. لقب" العانس" اللى بقينا بنسمعه كتير ومش بنسمع وبس لا وبنردده وبنرجع نخاف منه ... غريبة طب بنخاف ليه !! طب ما احنا اللى مطلعينه ... كلمة ملهاش اى اساس من تخويف بس للاسف احنا طلعنا فى مجتمع يقدس الحياة الزوجية وبس " ضل راجل ولا ضل حيطة " مش لازم تكونى ناجحة ف شغلك بس لازم تكونى ناجحة فى انك تتشعلقى ف ايد واحد بسرعة مش لازم تسافرى وتتدرسي اللى انتى حاباه قد ما لازم تسافرى بافكارك وخطتك اللى هتوقع العريس بسرعة لازم تكونى حلوة لا مش حلوة لازم تكونى محلوة يعنى حلاوة على حلاوتك عشان تعجبى اصل البنت مالهاش اللى بيتها فى الاخر هتخدي ايه من تعليم ولا من شغل انتى عاوز تضحكى الناس علينا ! تبص وتلاقى فعلا ده عرف المجتمع والمعظم بيعمل كدا ! تخافى انك تنشقي عن العرف المتعارف عليه بين الناس وتخافى من بصاتهم ونظرتهم ليكى واحساس الخوف يسيطر عليكى و الزن من اللى حوليكى يكهربك ويوترك اكتر. المفروض بقي انتي كبنت دورك الوحيد ف الحياة هو ازاى توقعى الاستاذ وتجبيه وتتجوزيه وبكده تكونى فى نظر المجتمع ناجحة نجاح باهر ..! دي نظرة الناس والمجتمع والعادات وتقاليد اللى كبرنا عليها وشفناها ومتغيرتش للاسف ... انتى تكونى فى نظرهم عانس ميشوفش فيكى أى حاجة وهو يكون عنده 60 سنة ويقولوا يا حرام ده لسه مدخلش دنيا مع ان يا سبحان الله ده فلان اللى يضرب بيه المثل فى كل حاجة ممتازة اخلاق ايه وسمعة ايه ندور له على حد يونسه وياخد بحسه ويهننه ف اخر ايامه .. لا ولسة كمان مصطلح يالا بقى شدي حيلك خلينا نفرح بيكى !! هو انتوا مينفعش تفرحولها غير بالعريس يعنى مش ممكن باى حاجة تانية !! يعنى انتى عايشة عشان هدف واحد هو الخوف من اللقب ده اللى اتزرع وكبرنا عليه وشوفناه انك دايما ملام عليكى .... طب لو الناس والمجتمع ادوا لك اللقب ده هتعملى ايه .. هتروحي تموتى مثلا ! انتى كنز انتى اساس المجتمع اللي هو صاحب اللقب المفروض عليكى من غير اى ذنب .. احلمي من حقك تحلمى ويكون ليكى طموحات فى انك تنجحى ف حاجة بتحبيها شايفة فيها نفسك ... الجواز محطة من محطات حياتك مش الهدف الاول والاخير نجاحك فيكى وليكى .. رتبى محطاتك وخليها واضحة قدامك وتابعيها كويس وشوفى حققتى ايه فى اد ايه وافرحى لنفسك بنجاحك ساعتها هتلاقى ان المجتمع اللى حبسك فى منظور معين وبس بيحتفل معاكى عشان انتى وصلتى لنجاح اجبرتيه انه يعترف بيكى ويفرحلك فى برواز ومنظور تانى غير الجواز ..... زى ما قلت حياتك محطات مش محطة واحدة .. قيمتك فى نجاحك واثبات نفسك وسدد ودانك عن قيل وقال. فرحتك بنجاحك فى حاجة بتحبيها احسن مليون مرة من نجاحك بانك تفوزى ببيت ويكون ده نجاحك الاول ومالوش تانى ونقول الاخير ..
