رصد اتحاد أمهات مصر للنهوض بالتعليم، برئاسة عبير أحمد، ردود فعل الأمهات من أولياء أمور طلاب الثانوية العامة عند علمهم بنتائج أبنائه أصحاب المجاميع المنخفضة والراسبين في بعض المواد، حيث تفاعل المئات منهن على صفحة الاتحاد على "فيس بوك". وقالت ولي أمر: "الحمدلله، بقولها راضيين ونصيب وربنا يعوضنا خير"، وأضافت أخرى: "كنت بدعمه وباركتله لأن زوجي توفي في نصف السنة، وهو أخ لثلاث بنات ورميت المسؤولية عليه". وذكرت أخري: "طبطبت عليه وقولتله احمد ربنا الحمد لله، ولحد الوقت ده نفسيته تعبانه وواقفين في ضهره أنا وباباه"، تستكمل أخرى: "فرحت ببنتى لأنها تعبت وكانت بتحل بمجهودها وقولتلها سلامتك عندى بالدنيا واخدتها في حضنى، وقولتلها ما منعك إلا ليعطيك، أكيد ربنا عنده خير أكتر وعسى أن تكرهوا شيئا وهو خير لكم". وتابعت أخرى: "حضنته في عز انهياري وتماسكت وقولتله قدر الله وما شاء فعل، أنا عارفة انك حليت كويس وعارفة إن دي مش درجتك وقولتله يلا نخرج في أي نادي". وقالت ولي أمر: "الحمد لله، بنتي مجموعها طبعا صغير بس أنا فخورة بيها لأنها طول عمرها من الأوائل، مش هعاقبها علي منظومة جديدة ، بنتي امتحاناتها كلها مع المدرسين طول السنة مقفلة وشهادات تفوق، أنا بنتي عملت فوق الطبيعي مش قصرت الحمد لله، دي كانت مقفلة المواد مذاكرة مش حفظ لأنها مش بتعرف تحفظ، أنا فخوره بيها وهفضل فخورة بيها الحمد لله بنتي مش قصرت انا لو بنتي علي النظام القديم كانت زمانها مش أقل من 96٪، الحمد لله حتي لو مش لحقت مرحله تانية برضه فخوره بيها، أنا اللي صعبان عليا هي لأنها منهارة ومش راضيه تقتنع بالذات بعد ما عرفت درجاتها، أنا زغرطت وهيصت ومبسوطة وراضيه وفخوره بيها، الحمد لله الحمد لله".
