بقدر ما تحمل الشعب من تبعات برنامج الإصلاح الاقتصادي الضروري والملح بقدر الفرحة العارمة مع ظهور ثمار البرنامج وإعلان الرئيس عبد الفتاح السيسي حزمة قرارات مهمة تستهدف في الأساس أن يشعر المواطن بثمار ما تحمله لسنوات. فرحة لا توصف رأيتها علي وجوه الموظفين والعمال وكافة فئات الشعب وهي بحق »بشرة خير» مع اقتراب حلول شهر رمضان المبارك أعاده الله علينا جميعا باليمن والخير والبركات.. وإزاء فرحة الشعب بتلك القرارات المهمة تخيلت هذا المشهد من الفيلم العربي الخالد »الزوجة الثانية» بين الفنان القدير المرحوم صلاح منصور »عتمان» وزوجته حفيظة التي جسدت دورها الفنانة العظيمة الراحلة ثناء جميل. حفيظة: قوم يا راجل متبقاش خوم نوم عتمان: وأقوم ليه أنا لا لي في الطور ولا الطحين أنا لا موظف ولا صاحب معاش حفيظة: يا سلام يا فالح دي رشة حلوة زيادة في الأجور والمعاشات وهتبقي زيطة.. مش الخير ده هيعم علي الجميع ما انت عندك أطيانك وزرعك والبيع هيبقي للركب عتمان: الله يحظك يا حفيظة ضحكتيني وهي الزرعة بقت تجيب كلفتها حفيظة: اعمل زي التجار دوبك يسمعوا عن أي زيادة للموظفين يرفعوا الأسعار وإيه الطاء طائين عتمان: لا يا حفيظة مش كل مرة تسلم الجرة الريس بتاعنا ما بيفوتش حاجة وحذر التجار من اللعب بالأسعار حفيظة: يا راجل هو الريس هيراقب بقالة بقالة ودكان دكان عتمان: يا هبلة دا في مباحث تموين وشرطة وحماية المستهلك اللي بيلفوا علي الأسواق بعربيات جديدة تهبل حفيظة: يا سلام حماية المستهلل يعني إيه المستهلل ده بأه عتمان: يا جهلة ده جهاز حماية المستهلك مش المستهلل عملته الحكومة عشان تمسك كل اللي بيغش بضاعة أو حتي خدمة حفيظة: والله ما انت فاهم حاجة بتكرر كلام وخلاص زي الببغان عتمان: لأه المرة دي صدقيني خصوصي.. وزير التموين قال إن الريس بيسأله إذا زادت سعر سلعة نص جنيه أي والله نص جنيه حفيظة: طيب أنا أهه وانت أهه كلها أيام وييجي رمضان وبكره نشوف عتمان: اطمني وحطي في بطنك بطيخة صيفي المرة دي محدش هيستجري يرفع سعر أيها حاجة حفيظة: طب يا فالح قوم بأه هات لنا حاجات رمضان عتمان: يا وليه الليالي جيه لسه بدري علي رمضان وبعدين ده شهر كريم صيام وعبادة مش أكل وخلاص حفيظة: أنا قلت الليلة يعني الليلة وتكتر الياميش والمكسرات عتمان: هي حبكت.. يا بختك الاسود يا عمدة مش لسه خالصين من موال مصروفات التيرم التاني في المدارس حفيظة: يا سلام يا أخوي.. كل ده عشان تكدس الفلوس لابن المزغودة فاطنة.. قوم يا خفيف هات لنا المطلوب.. أقول لك: روح معرض أهلا رمضان عتمان: بس ده هيفتح لسه يوم 21 في الشهر سبيني بقي أنام حفيظة: نامت عليك حيطة قوم فز هات الحاجات من أي حتة عتمان: شوفي بأه هدوم ومش لابس خروج النهاردة ومش خارج وليميها بأه.. طيب علي الطلاق مني خارج ولا جايب حاجة.. هه حفيظة: طلاق إيه يا مخبول مش أنا وانت متنا وهو في ميت بيطلق يا خلل عتمان: هو احنا متنا أي والله متنا م الضحك حفيظة: وكمان بتهزر.. بقي يا راجل يا ناقص تجوز علي البت فاطنة عشان الواد وتنهب ال 100 فدان بتوعي عتمان: جواز إيه بس يا حفيظة ده احنا في الآخرة والكفن ملوش جيوب حفيظة: خلاص اتخمد نام بس خيوبا علي هصحيك في كل مناسبة.. عشان أجيب داغك.. سيبني بقه أشوف الفيسبوك بتاعي
